Eşkerekerdena şehîdbîyayena tayê endamanê Têgêrayîşê Azadîya Kurdîstanî ra dima zaf bajaranê vakurê Kurdîstanî û Tirkîya de şînî û bernameyê vîraardişî ameyî viraştene. Bi hezaran kesî tewrê nê şîn û vîraardişan bî, labelê Amed û Manîsa de vera kesê ke tewrê nê şînan bîyê operasyonî virazîyayî û nêzdîyê 15 kesan ameyî destbenkerdene. Rêvebera Heyetê Rêveberîya Merkezî ya ÎHDyî û huquqnasa nasbîyaye Eren Keskîne derheqê nê destbendkerdişan û tedayan de Ajansê Welatî rê qisey kerd.
‘Şarê Kurdî mîyanê dejanê giranan de zî aşîtîye de israr keno’
Eren Keskîne dîyar kerd ke tevî ke hetê dewlete ra gamê eşkerayî nêameyê eştene zî, şarê kurdî bira xo ya aşîtîye daya. Keskîne ard ziwan ke şer de bi hezaran kesan merdimê xo vîndî kerdî, raştê îşkence ameyê û dejê giranî antê, labelê reyna zî waştena aşîtîye de israr kenê û ewro wazenê bi hawayêko serbest wayîrê nê dejanê xo vejîyê.
‘Hetê huquqî û mordemîye ra nêno qebulkerdene’
Keskîne îfade kerd ke tu zerarê şîn û vîrardişan çin o û sedemê nê astengîyan nîjadperestî ya. Aye bale ante ke badê eşkerayîyanê Şamîl Tayyarê AKP’yîjî nê operasyonî ameyê kerdene. Keskîne ard vîr ke Tirkîya îmzakara Peymana Cenevre ya; na peymane heqê definkerdişê birûmetî û rayraberdişê progmramanê vîrardişan virazena kesanê ke şer de cuya xo vîndî kerda. Reyna goreyê madeya 130. ya TCK’yî heqaretê vîrardişê merdeyan suc o û astengkerdişê şînî zî goreyê aye heqaret o.
‘Girêdayena propagandaye trajîkomîk o’
Keskîn girêdayena “propagandaya rêxistine” trajîkomîk name kerd û vat ke zemanêk de ke dewlete qanûnan hazir kena û raya pêroyî hişyarê gamanê neweyan a, destbendkerdişê kesanê ke tewrê şînî bîyê vera huquq, wîjdan û exlaqî de yo.
‘Bêbawerîye vejena werte’
Pêynîye de Keskîne ard ziwan ke no nêzdîbîyayîş bawerîya bi prosesî kêmî kena û raya ameyena kesanê ke teberê welatî de yê gêna. Aye dîyar kerd ke eke dewlete raştî zî aşîtîye wazena, gerekê rêz bigêro qanûnanê ke xo îmza kerdê û firset bido ke merdimî bi serbest şînê xo bikerê.
