Kursanê ziwanî de ke Şaredarîya Amedî ya Şaristanê Girdî goreyê fehmê xizmetê zafziwanî organîze kena, qeydanê demserra newîye dest pêkerd. Muracatê kursanê kurmanckî, zazakî, sorankî, armenkî û suryankî do mabênê 1-14ê êlule 2026î de DÎSMEK ser o bêrê kerdiş.
Şaredarîya Amedî ya Şaristanê Girdî, bi amancê pawitişê awanîya şaristanî ya zafziwan û zafkulturî, xurtkerdişê ziwananê ke ciwîyenê û newe ra eşkerakerdişê ziwananê kehenan, xebatanê xo dewam kena. Mudirîya Şûbeyê Pawitiş û Averberdişê Ziwanan ke binê banê Serekîya Daîreya Kultur, Huner û Karanê Komelkîyan de falîyet kena, demserra perwerdeyî ya newîye de do kursan organzîe kena.
Hîrê daraxan de kursê kurmanckî û zazakî
Çarçewaya bernameyê demserra newîye de kursê kurmanckî û zazakî do daraxanê A1, A2 û B1î de bêrê kerdiş. Bi perwerdeyanê ke daraxê destpêkî ra heta daraxê mîyanênî ameyî plankerdiş, yeno amanckerdiş ke qabîlîyetê kursîyeran ê wendiş, nuştiş, goşdarîkerdiş û qiseykerdişî bêrê averberdiş.
Kursê ke amanc kenê piştî bidê musayîşê lehçeyanê kurdkî yê cîya-cîyayan û bikarardişê ci yo hîna vila yê cuya rojane, eynî wextî de do mabênê neslan de neqilkerdişê ziwanî rê zî piştî bidê.
Daraxê destpêkî de perwerdeyê sorankî
Kursê sorankî yo ke do demserra newîye de bêro akerdiş, do daraxê A1î de bêro dayîş. Perwerdeyan de yeno amanckerdiş ke kursîyerî awanîya ziwanî ya bingeyîne ya sorankî bimusê û qabîlîyetanê têkilîye yê bingeyinan qezenc bikerê.
Kursê armenkî û suryankî zî bername de yê
Ziwanê kehenî yê ke vîrê Amedî yê tarîxî û kulturî de cayêkê ci yo muhîm est o, bernameyê kursanê demserra newîye de zî ca gênê. Kursê armenkî do daraxanê A1, A2 û B1î de, kursê suryankî do daraxê A1î de bêro dayîş.
Bi nê perwerdeyan yeno amanckerdiş ke ziwanê kehenî bêrê pawitiş, musayîşê înan bêro teşwîqkerdiş û cuya şaristanî de newe ra bêrê dîyayîş.
Muracatî DÎSMEK’î ser o benê
Kesê ke wazenê beşdarê kursanê ziwanî bibê, do mabênê 1-14ê êlule 2026î de adresa dismek.diyarbakir.bel.tr ser o qeydê xo bikerê.
