Hemsereka Dayîreya Têkilîyanê Teberî ya Îdareyê Xoserî Îlham Ehmede derheqê prosesê neweyî de reaksîyon û erjnayîşê krîtîkî pare kerdî. Ehmede dîyar kerd ke entegrasyonê QSDyî nêyeno a mana ke heme dosyeyî qedîyayî û vat: “Têkoşîno tewr gird do pawitişê ziwanê kurdî, temînkerdişê heqanê qanûnî û pawitişê destkewteyanê şehîdan o.”
Hemsereka Dayîreya Têkilîyanê Teberî ya Îdareyê Xoserî Îlham Ehmede roportajêkê taybetî de kanalê Rojava TVyî ser o netîceyê pêdîyayîşanê peyênan ê Şamî û reaksîyonê komelî erjnayî. Ehmede bale ante perwerdeyê bi ziwanê dayîke, dosyeya tepişteyan, agêrayîşê koçberan û ameyoxê YPJyî ser o.
“Munaqeşeya sereke ziwanê dayîk o”
Ehmede dîyar kerd ke pêdîyayîşanê Şamî de mewzûyo sereke perwerdeyê bi ziwanê dayîke bî û hesasîyetê şarê kurdî yê ziwanî nêzdîbîyayîşêko rast pênase kerd. Ehmede dîyar kerd ke têkoşînê înan o sereke yê qonaxa newîye Sûrîye de seba cagirewtişê ziwanê kurdî û heqanê şarê kurdî qanûnê neweyî yo.
“Dosyeya YPJ û tepişteyan hema nêqedîyaya”
Derheqê munaqeşeyanê entegrasyonê Hêzanê Sûrîyeya Demokratîke (QSD) de Ehmede îfade kerd ke na game heme problemî çareser nêkena û vat: “Munaqeşeyê çend dosyeyan dewam kenê. Nînan mîyan de meseleya entegrasyonê Yewîna Pawitişê Cinîyan (YPJ) û vurnayîşê nameyê komare hema nêqedîyayî.” Ehmede sewbîna dîyar kerd ke dosyeya tepişteyan heme pêdîyayîşan de rojdem de ya û karûbarê nê mewzûyî qonaxa ameyoxe de do hîna lez bibê.
“Ma do heme destkewteyan bipawê”
Derheqê agêrayîşê koçberan de Ehmede dîyar kerd ke agêrayîşê koçberanê Serêkanîyê herra do çarçewaya peymanêk de bêro organîzekerdene ke aramîya herême û heqê înan garantî kena.
Ehmede rexneyê peyênî yê keyeyanê şehîdan zî erjnayî û no mesaj da: “Rexneyê keyeyanê şehîdan bi temamî rast ê. Qonaxa nikayîne hewceyîya xoerjnayîş û girêdayîya sozan wazena ke seba şehîdan ameyî dayene. Ma do heta peyê sozê xo yê seba şehîdan de bimanê û heme destkewteyanê ke ameyî girewtene, bipawê.”
