Karkeranê asinê înşaatî yê Amedî, vera vayîya şertanê giranan ê xebate eşkerayî daye û wina vat: “waştişê ma îmtîyaz nîyo, heqê keda ma yo.”
Karkeranê asinê înşaatî Amed de semedê şertanê giranan ê kar û xebatanê înan, seba waştişê xo yê heqdestî û heqanê karkerîye Parka Sumerî ya qezaya Yenîşehîr ê Amedî de eşkerayî daye. Xeylê sazgehê sivilî zî tewrê eşkerayîye bîyî.
Serê nameyê karkeranê asinî de metnê eşkerayîye hetê Kadrî Bozanî ra ame wendene.
Eşkerayî de ame dîyar kerdene ke 1ê tebaxe 2026î ra nat heqdestê înan ê rojane bîyo 3 hezar lîra û vengdayîşê heme karkeran ame kerdene ke binê nê heqdestî de mexebitîyê. Kadrî Bozan dîyar kerd ke semedê enflasyonî, zêdebîyayîşê kîrayan û vayîya lazimîyê bingeyînî endî nêşkenê keyeyanê xo weyî kerê û nê çîyî ardî ziwan: “Serrêke verê cû heqdestê ma 2 hezar û 200 lîra bî û zêdekerdişê 300 lîra yê seba emserî ameyo peşnîyazkerdene qîm nêkeno.”
Kadrî Bozanî eşkerayîye de bale ante serê muhîmîya ewlîyîya kar û wina domna: “Karê asinî kede, westayî, sebir û berpirsîyarîyêka girde wazeno. Wexto ke westayêk xebitîyeno, ganî hişê ey de fikarê debare ney, ewleyîya karî bibo û îhmalîyêka qije eşkena bibo sebebê bobelatî. Waştişê ma îmtîyaz nîyo, heqê keda ma yo.”
Sewbîna Kadrî Bozanî eşkera kerd ke 1ê tebaxe ra tepîya heqdestê rojane ya westayanê asinî yê Amedî sey hîrê hezar lîra ameyo dîyar kerdene û vengdayîşê heme karkeran eşkerayî qedêna: “bê tawîz, nê qerarî rê wayîr vejîyê û binê nê qerarî de mexebitîyê. Vengdayîşê ma seba şîrket û taşeronan zî bi peşnîyazanê kêmî erjê kede mefînê û rêze heqê karkeran rê bigîrê. Heta ke heqê keda ma bêro dayene ma do têkoşînê xo dewam bikerê.”
