Sîyasetmedar û akademîsyen Hişyar Ozsoyî tewrê programê Îlke TV bi û diyar kerd ke hepiskerdişê sîyasetmedaranê kurdan û welat ra durvistişê înan, nêyeno a mana ke vernîya sîyasetkerdişê înan do bêro astengkerdene û wina vat: “Ganî vernîya xebata sîyasetmedaranê kurdan ê warê demokratîk de bêro akerdene.”
Hişyar Ozsoyî dîyar kerd ke hepiskerdişê sîyasetmedaranê kurdan û welat ra dûrvistişê înan, vernîya sîyasetkerdişê înan nêyeno astengkerdene û qedexeyê xebatanê sîyasî heta nika ti netîce nêgirewto. Sîyasetmedarê kurdî xebatanê xo yê sîyasetî çi hepisxane çi zî surgun de bo domnenê û vat: “Şima sîyasetmedaran kenê hepisxane uca de sîyaset kenê, şima erşawenê surgun xebata sîyasetkerdişî ra fek veranêdanê. Madem rewşe wina ya wa bêrê verê çimanê heme kesan de bi şeklêko demokratîk sîyasetê bikerê.“
‘Amanc çareserkerdişê meseleya kurdan a’
Hişyar Ozsoyî dewamê qiseykerdişê xo de dîyar kerd ke motîvasyonê Selahattîn Demîrtaşî, Îdrîs Balûken û Hasan Basrî Firatî yo ke surgun de cuya xo ra bîyî, karîyer yan zî îtîbaro şexsî nîyo. Amancê sîyasetmederanê kurdan o bingeyîn çareserkerdişê meselaya kurdan a, awankerdişê aştîyêka domdar o û wina dewam kerd: “Astengkerdişê sîyasetmedaran heta nika netîce nêgirewto û seserrî yo şima kurdan rê sîyaset qedexe kerd, se bi ? Akerdişê rayanê sîyasetî seba meselaya kurdan zaf muhîm o, cagirewtişê aktoranê sîyasî yê mîyanê sîyasetê demokratîkî do hêz bido prosesê çareserî.
Peynîya qiseykerdişê xo de Hîşyar Ozsoyî dîyar kerd û vat: “Eke hukmat û dewlete vajê ma do nê prosesî bi hawayêko eşkera komelî reyde pare bikerê, o wext muxalefet zî hîna zêde bi cesaret do vejîyo meydan.”
