Festîvala Xoza û Kulturî ya Depî ya ke do hîrê rojî dewam bikera, siba bi dîwanê dengbêjan dewam bikera.
Festîvala Xoza û Kultur a qezaya Depî ya Xarpêtî ke do 31ê temmuze, 1 û 2yê tebaxe de bêra viraştene, siba dest pêkena. Festîvale do 31ê temmuze de bi dîwanê dengbêjan dest pêbikera. Dîwanê dengbêjan do saete 18:00î de Otoparkê Depî de bêro ronayene dengbêj Perîxana Şirnexî, Ehmedê Xî, Heyderê Qulpî, Hedîye Kalkan, Xalê Rûstem û Hekîmo do ca bigîrê.
Panel û konser
1ê tebaxe de do bi moderatorîya Endamê Meclîsî yê DBP’yî Ûgûr Bayrakî bi tewrbîyayîşê endamê Sekreteryaya Îmralîyî sîyasetmedar Veysî Aktaş û aktîvîsta TJA Ayla Akat Ata do serê prosesê sîyasî de saete 15:00î de Salona Konferansî ya Şaredarîya Depî de panelêk bêro viraştene.
Eynê roje do saete 18:00î de Baxçeyê Mîlet ê Taxa Bahçelîevlerî de hunermend Erol Berxwedan, Azad Bedran û Silbûs û Tarî konser bidê. Sewbîna Hemşaredarê Depî Eda Durmuş û Cafer Ogûr zî do festîvale de qisey bikerê.
2yê tebaxe de zî bi moderatorîya endama Meclîsî ya DBP’yî Zohre Eroglu bi tewrbîyayîşê aktîvîsta TJA Sebahat Tuncel, nuştox û akademîsyen Yildiz Onen do saete 15:00î de Salona Konferansî ya Şaredarîya Depî de panelê bi nameyê “Cinî û Aştî” bêro viraştene.
Festîvale do bi konserê Koma Amed biqedîya
Eynê rojê do saete 18:00î de Baxçeyê Mîlet de Şengul Pak, Eylul Nazlier û Koma Amed sehne bigîrê. Sewbîna Serekwekîla Grûba DEM Partî Gulîstan Kiliç Koçyîgît do qisey bikera. Festîvale do bi konserê Koma Amedî biqedîya.
