Komîteya Koordînasyonê Şaristanî ya TMMOBê Amedî derheqê şewato ke dewanê Licê de vejîya bî de eşkerayî da Çapemenî. TMMOBî dîyar kerd ke netîceyê şewatê firêzeyan de nêzdîyê 300 dekar warê ramitişî zerar dîyo û vengdayîşê raya pêroyî kerd ke pawitişê xoza gureyê heme komelî yo.
Komîteya Kordînasyona Şaristanî ya TMMOBê Amedî derheqê şewatê dewanê Muradîye û Kaley yê qezaya Licê ya Amedî de vejîyabî de raporê xo yê cigêrayîşî wareyî pêşkeşê raya pêroyî kerd. Xeylê endam û temsîlkarê sazgehanê sivîlî tewrê eşkerayî bîyî. TMMOBî eşkerayî bînaya Şûbeyê Odaya Muhendîsanê Ceyranî (EMO) yê Amedî daye. Eşkerayî ra ver Hemverfeka Komîteya Koordînasyonê Şaristanî ya TMMOBê Amedî Fatoş Nujen Ayhan qiseykerdişê xo de dîyar kerd ke zeraro tewr gird merdimî danê xoza ro. Dima ra Hemverfekê Komîteya Koordînasyonê Şaristanî ya Amedî Ahmet Sormaz qisey kerd û wina vat: “Semedê ke ma baş wayîrê xoza nêvejîyenê û baldar nêbenê, ma xozaya xo bi destê xo veşnenê.”
Badê ra Hemsereka Şûbeyê Muhendîsanê Zîretî yê Amedî Gulçîn Yaşa metnê eşkerayî wend û wina vat: “Goreyê netîceyê destpêkî yê ke ware de tespît kerdê, ameyî dîyarkerdene ke semedê şewate firêzeyê nêzdîyê 150 dekar vaşê puşî û bahçeyê fêkîyan û tewlê naye pêroyî nêzdîyê 300 dekar erdê ramitişî zî binê tesîrê şewatî de mendo.“
Gulçîn Yaşa eşkerayî de dîyar kerd ke seba qedîyayîşê ramiteyan rasterast vîndîbîyayîşê berheman nêbîyo û wina dewam kerd. “Reyna zî netîceyê şewate de 350 rezê engure û xeylê darê fekîyan veşayê. Sewbîna wasitayê zîretî yê sey wasitayê sondajî, makîneyê deştene û tirpan, depoyê awe, borîyê awdane, 2 konteynirê prefabrîkî, hulika mêsanê hengemînî, kuwareyê vengî yê hemgemînî û gomeyêk bi kemeran ameyo viraştene bi temamî hesar dîyo.”
Şewat kaleke ra dest pêkerdo
Gulçîn Yaşa dîyar kerd ke goreyê tespîtana verênan, şewat kaleke ra dest pêkerdo û wina vat: “Îhtîmalêko gird netîceyê îhmalê merdîman de bi zanayîş yan zî bi nezanî vejîyayo. Netîceyê şewatan tena zerar nêdano vaşan; eynî wextî de rîyê herrî, cîyayanê bîyolojîk, cuya kovî û ekonomîya dewijan xirab kena.”
Vengdayîşê şarê Amedî ame kerdene
Gulçîn Yaşa peynîya eşkerayî de bale ante serê berpirsîyarîya hempare û seba pawitişê herrî û xoza vengdayîşê şarê Amedî kerd û wina vat: “Bê sebeb firêzeyan mêveşnê, cixaraya taviste merzê mîyanê xoza, waro akerde de tedbîrê adirî bigîrê û wexto ke tehlukeyê adirî vîna cade sazgehanê eleqedar hayîdar bikerê.”
Gulçîn Yaşa vîr vist ke daristan, warê ramiteyî û dorme tena yê ewroyî nîyê, eynî wextî de mîrasê neslanê ameyoxî yê û pawitişê înan gureyê heme komelî yo.
