Îranî, vera ambargo û hêrişanê DYA’yî, welatanê kendawî tehdîd kerd ke ê do binawanîya enerjî û ekonomîya welatanê kendawe hedef bigîrê. Sewbîna mesajê “Herêma ke ma nêeşke tede petrol biroşi, tu kes zî nêeşkeno petrol biroşo” da.
Mabenê DYA û Îranî de hêrişê beramberê yewbînan dewam kenê, hetê Îranî ra eşkerayîyê huşkî pey dima yenê. Qerargehê Merkezî yê Xatemul Enbîyayî yê Îranî eşkerayîyêk vila kerde û ard vîr ke Amerîka hêrişanê xo bidomno, ê do heme binawanîya ekonomî û enerjîyê welatanê kendawe hedef bigrê.
Eşkerayîye de ame vatene: “Eke tehdîdê Amerîka bêrê caardene, Hêzanê Çekdaran ê Komara Îslamî do nêverdê dilopêke petrol bêro erşawitiş û heme binawanîya petrol, gaz, cereyan û ekonomîya herême do bibo hedef.”
Sewbîna ame îqazkerdene ke: “Badê îqazê şewa bîne, Neqebê Hurmuzî girewte yo û her keştîyêke wazena neqebî ra derbas bibo, ganî goreyê madeyê ke vere cû ameyê dîyar kerdene, teqîb bikero.”
Muhammed Baqir Kalibaf: Herêma ke ma nêeşke tede petrol biroşê, tu kes zî nêeşkeno petrol biroşo
Serekê Meclîsê Îranî Muhammed Baqir Kalibaf hesabê xo yê medya dîjîtal ya X’î de eşkerayîyek vîla kerd û vat: “Hetanî ewleyîya Îranî nêro garantîkerdene, tu binawanîyêk zî ewleyîye de nîya. Rewşa Neqebê Hurmuzî do agêrayîşê rewşa veren yê şerî nêbo. Herêma ke ma nêeşke tede petrol biroşi, tu kes zî nêeşkeno petrol biroşo.”
