Ane Yeşîl, dewa xo Îksor de 30 serrî yo ke tira dûr menda. Dewlete dewa aye kerde tal. Di lazê xo pîya heşt serrî de ju caye xo vurna. Key ke dewa xo bîya ra, peyser ameya dewa xo. Malcîyen kena û dewijanê xo rê wîna vana: “Juyê ke çîme xo birneno berê dewa xo, dewa xo şên bikerê.”
Ane Yeşîl, weşîya xo Îksor de ramnena. Dewarê xo est ê malcîyen kena. Leyê xo de di laje xo est ê. Pîya qayîtê mal kenê. Dewa aye verêne Deşte ya , badê zevecyaşîya xo şîya dewa Îksor. 30 serre dewa xo Îksor ra dûrî menda. Dewlete 1994î de dewa aye kerda tal. Înan zî bar kerd şîyê û heşt serrî ra dima caye xo vurna. Badê ke şîya dewa xo. Nika malcîyen kena. Ana Yeşîl, ma rê dewa xo ser û seba kare xo qisey kerd.
‘Verê dewa ma zaf rinde bî nika wina nîya’
Ane Yeşil, seba dewa xo qisey kene û wîna vana: “Dewa ma rinde bî, dewa xo ra ma vetîme. Ma zaf çî dî, heşîrîye zaf bî. Dewlete ma re va ke bar kere şerê, zereyê heşt roje de bar kerdîme. Male ma teber de bê şiwane bî, zereyê birî de mend. Şîyame Mazgird heşt serrî mendîme, tepîya şîyayme dewa bîn. Key ke dewa ma kerdî ya, peyser ameyîme dewa xo. Ma kotî ra bizanîme ke nîya beno. Verê dewijê ma zafî bî, her çîye ma bîbî, şên bîme. Nika ûnceme.”
‘Çar serrî yo ke zereyê nê karî de gureyena’
Ane Yeşîl, qiseykerdîşe xo peyên de wîna vat: “Nika xo re tena bizî girewtîme, dewa xo de vaş çînenîme. Seba zimistanî alefe mal danê arê. Welate ma zaf rindo, juye ke bese kenê bêro dewa xo, xo re ban virazo, malcîyen bikero, daran nane ro. Raye ma çin a, pirde ma laşerî berdo, mare paştî bidê. Bêrê dewa xo, dewa xo re wayîr vejîye. Karê dewan giran o, le to het de kes ke çin bo, nê beno. Çar serrî yo ke zereyê na karî de gureyena. Ma kare camerdî kerdêne. Tirpancîye hewla la ma ke bese nêkerdene bi gureyene. Nika ginena war.”
