Rayberîya Têgêrayîşî derheqê serrgêra veşnayîşê çekan de eşkerayî daye û wina vaşt: “Serrgêra 1. ya merasîmê veşnayîşê çekan ê 11ê temmuze de sey Têgêrayîşê Azadîye israrê xo yê serê stratejîyê têkoşînê sîyasî û demokratîkî reyna mojnenê. No nêeştişê game yê îqtîdarê AKP û MHP’yî nêzdîbîyayîşo nerast ê vera prosesî yo. Ma zî goreyê berpirsyarîya xo ya seba şaranê xo, mîyanê çarçewaya manîfestoyê komelê demokratîk ê Serek Apo de wezîfeyê xo nika ra pey zî do bîyarî ca.”
Rayberîya Têgêrayîşîbi wesîleyê serrgêra 1. ya merasîmê veşnayîş yan zî îmhakerdişê çekan eşkerayî daye. Eşkerayîya ke Ajansê ANF’yî de ameya weşanayene, wina ya:
“Serrgêra 1. ya merasîmê veşnayîşê çekan ê 11ê temmuza 2025î yo. Hemsereka Konseya Rayraberdiş a KCK’yî Besê Hozat 29 embazanê xo reyde par 11ê temmuze de vernîya Eşkefta Cesena ya tarîxî ya ke nêzdîyê Silêmanîye ya, uca çekê xo veşnayî. No merasîmê veşnayîşê çekan ke vernîya çimanê grûbêka pîl a rojnamegeran de amebi organîzekerdiş, hetê heme dinya ra amebi taqîbkerdene. Seba çareserîya sîyasî û demokratîke ya meseleyê kurdî yê Tirkîya de sey gamêka muhîme ameybî vînayene.
Serek Apo Vengdayîşê Aştî û Komelê Demokratîkî yê 27ê sibate de sebebê vejîyayîşê meseleyê kurdî û rayîr û rêbazê ci yê çareserîye bi metodêko esasî û balkêş dîyar kerd. Eşkera kerd ke bingeyê qebulkerdişê estbîyayîşê kurdan ser o, demê çareserîya demokratîke ameyo. Seba caardişê nê çîyan zî veng da ke PKK bêro fesîhkerdene û têkoşînê çekdarî yê vera Tirkîya bêro qedênayene. Dimayê nê vengdayîşşî 1ê adara 2025î de ma adirbest îlan kerd. PKKyî mîyanê 5-7ê gulane de Kongreya xo ya 12. viraşt û qerar da ke PKK bêro fesîhkerdene û xebata çekdarî ya vera Tirkîya bêra qedênayene. Qerar girewt ke caardişê nê qeraran zî hetê Serek Apo ra bêro kerdene.
Hemsereka ma ya Konseya Rayraberdişî Besê Hozat û embazê ma, mîyanê çarçewaya nê qerarî de seba îrade û qerardarîya vurîyayîşê stratejî û qebulkerdişê stratejîyê sîyasetê demokratîkî bimojnê, çekê xo veşnayî. Seba mojnayîşê îradeyê qerarrdarî yê serê stratejîyê sîyasetê demokratîkî, Heêsereka Konseya Rayraberdişî Besê Hozat na grûbe rê pêşengîye kerd. Merasîmê veşnayîşê çekan zî sey sembolê vurîyayîşê stratejî ame organîzekerdene.
Embaza ma Besê Hozat ke berpirsîyara grûba 30 kesî bîye, seba caardişê nê vurîyayîşê stratejîkî vat, seke Serek Apo vengdayîşê 27ê sibate de diyar kerdo, şertê huqûqî û sîyasî her wext ganî bêrî ca. Merasîmê veşnayîşê çekan bi îlanê ê çîyî ke stratejîyê têkoşînê çekdarî ser o apey agêrayîş nêbeno. Seba mojnayîşê nê îradeyî, ganî dewleta tirkan hetê caardişê stratejîyê têkoşînê sîyasî û demokratîkî de gamê huqûqî û sîyasî bieştêne. Labelê serrêk qedîyaye ke gamê bi nê hawayî nêameyê eştene.
Mîyanê sîstêmê serrêk de Têkoşînê ma yê Azadîye seba caardişê lazimtîyanê huqûqî û sîyasî gamê yewhetî eştê. Endamê Konseya Rayraberdişî yê KCK’yî embaz Sabrî Okî raya pêroyî rê eşkera kerd ke gerîlayî xo anto teberê sînorê Tirkîya, herêmê ke rîskê şerî tede est bî terk kerdî. Na eşkerayî seba ê çîyî bîye ke zemîn pêşkêşê dewleta tirkan bêro kerdene ke gamanê sîyasî û huqûqîyan bierza. Têkoşînê ma yê Azadîye bi berpirsyarî hereket kerd, labelê dewlete ne gamêk eşt, ne zî seba çareserîya sîyasî û demokratîke zemînê mîyanê şarî awan kerdo. Famkerdiş û nêzdîbîyayîşê negatîfî yê verênî yê vera Serek Apo û Têkoşînê ma yê Azadîye, bi zanayîş ameyî dewamkerdene.
Dem bi dem Serekkomar, Devlet Bahçelî û ekîbê rayedarê AKP’yî eşkerayîyê wayîrvejîyayîş û rayberîya sîstemî dayî, labelê nê vatişî pratîk de nêbîyê rast. Rixmo ke serrêk mojnayîşê îradeyê veşnayîşê çekan ser ra derbas bîya zî warê sîyasî û huqûqî de averşîyayîşêk nêbi. No çî zî bi sebeb ke mîyanê kurdan û raya pêroyî ya Tirkîya û dinya de nîyetê îqtîdarî ser o fikar û gumanî peyda bibî. Rîxmê nê fikar û gumanan zî, serrgêra 1. ya veşnayîşê çekan de ma stratejîyê têkoşînê sîyasî yê demokratîkî de israr kerd, labelê îqtîdarî bi polîtîka û helwêstê xo cewab nêda nê cehd û israrê ma.
Nîka yeno munaqeşakerdene ke qanûnê çarçewa bêro vetene yan nê ke no qanûn hetê Serek Apo ra amebi pêşnîyazkerdene. Hem pêşnîyazanê maqûl ê Serek Apo rê cewab nêame dayene, hem zî na babete de Têkoşînê ma yê Azadîye nêame haydarkerdene. Muxatabê verên û bingeyên ê qanûnê ke behsê ci yeno kerdene Serek Apo û Têkoşînê ma yo, labelê rixmê na rastî zî behsê pêşnûmine qanûnêko yewhetî yeno kerdene ke no zî mojneno ke nêzdîbîyayîşêko cîdî seba problem û prosesî nêyeno mojnayene. O tewr muhîm zî, qanûno ke wazenî hedre bikerî, tena seba ronayîşê çekan o. No çî zî mojneno ke problemê seserrî bi metodêko rast nêno erjanyene. No qanûn her çî ra ver ganî bibo o qanûn ke pozîsyonê Serek Apo û kadroyanê pêşeng ê Têkoşînê ma yê Azadîye diyar bikero û rayîrê çareserîya problemê kurdan dîyar bikero. Tewrê na rastîye, vatişê ke vanê do Serekê ma teberê nê çîyî de bêro verdayene, yeno manayê sabotekerdişê prosesê aştî û komelê demokratîkî. Şarê ma zî Têkoşînê ma yê Azadîye zî xeylê reyan diyar kerd ke nêzdîbîyayîşê dûrî şertanê kar û cuya azade ya Serek Apo do nêrê qebulkerdene. Nê prosesî de her çî ra ver ganî na rastî bêra zanayene.
Serrgêra yewine ya merasîmê veşnayîşê çekan a 11ê temmuze de bi nameyê Têkoşînê Azadîye ma israrê xo yê babeta stratejîyê têkoşînê sîyasî û demokratîkî ser o reyna eşkera kenî. Rixmo ke fesîhkerdişê PKK û qedênayîşê têkoşînê çekdarî ser ra serrêk derbas bîya zî, neeştişê gaman ê hetê îqtîdarê AKP-MHP’yî ra nêzdîbîyayîşêko nerast ê serê prosesî yo. Eşkera yo ke tecrubeyanê çareserîya şerî de ma nêzdîbîyayîşêko tewr maqûle mojnenê. Yeno zanayene ke ma nê çî mîyanê çarçewaya caardişê cuya demokratîke û azade ya şaranê xo de kenî. Berpirsyarîya ma hemînan a ke ma Tirkîyayêka demokratîke awan bikerî ke şarê ma bingeyê entegrasyonê demokratîkî ser o bi hawayêko azad biciwîyo. Şarê kurd û pêro şarê Tirkîya seba afirnayîşê Tirkîyayêka bi nê hawayî ganî berpirsyarîyanê xo her hetî ra bîyarî ca. Ma zî goreyê berpirsyarîya xo ya seba şaranê xo, mîyanê çarçewaya manîfestoyê komelê demokratîk êSerek Apo de, wezîfeyê xo nika ra pey zî do bîyarî ca.
Rayberîya Têgêrayîşî.”
