Hevşaredarê Agiriyê Memet Akkuş ê ku jiyana xwe ji dest daye, bi tevlibûna hezaran kesî li Goristana Fatîhê hat veşartin.
Ji bo Hevşaredarê Agiriyê Memet Akkuş ê ku jiyana xwe ji dest dabû, ewilê li baxçeyê şaredariyê bîranînek hat pêkanîn. Bîranîn bi rêzgirtinê dest pê kir. Parlamenterên DEM Partiyê yên Agiriyê Heval Bozdağ û Nejla Demîr, Rêveberên partiyên siyasî, nûnerên saziyên sivîl, rêveberiya CHPê ya Agiriyê û gelek welatî tev li bîranînê bûn.
Di bîranînê de Hevşaredara Agiriyê Hazal Aras bal kişand ser têkoşîn û dilsoziya Mehmet Akkuş û got: “Serokê me Mehmet Akkuş di tevahiya jiyana xwe de ji bo azadî, edalet û jiyana birumet a van axan kedeke bêhempa da. Em ê feraseta wî ya şaredariya gelparêz, helwesta wî ya rast û mîrateya ku ji me re hiştiye dê di her şert û mercî de bidin jiyîn. Em êşa kûr a windakirina rêhevalekî ku cihê wî nayê tijîkirin dijîn.”
Hevberdevkê Desteya Rêveberiyên Herêmî Mustafa Avci diyar kir ku Mehmet Akkuş neferekî ji kevneşopiya berxwedêr e û ev tişt gotin: “Hevalê me Memet Akkuş di demên herî zor de jî ew kes bû ku xwedî li îradeya gelê xwe derket û li dijî faşîzm û neheqiyan paş de gav neavêt. Îro li vir em ne tenê hevşaredarekî, ewladê gelê xwe ê evîndarê azadiyê ber bi rêwîtiya dawî ve dişînin. Em li ber bîranîna wî bejna xwe bi rêzdarî ditewînin û soz didin ku em ê ala ku me dewr girtiye her dem bidin hildan.”
Piştî bîranîna li baxçeyê şaredariyê, nimêja cenaze li Mizgefta Mezin a li navenda bajar hat kirin û piştre cenaze li Goristana Fatîhê hat veşartin.
Piştî merasîmê, malbat û nasên wî ji bo qebûlkirina sersaxiyê derbasî Mala Şînê ya Unsallar a li Taxa Firatê ya li navenda Agiriyê bûn. Hat ragihandin ku bernameya sersaxiyê dê 3 rojan berdewam bike.
