Stenbol – TEV-KOM musabeqaya hîkaye û şîîranê kurdkî virazeno. Endamê TEV-KOM’î Omer Bayraktarî derheqê musabeqaye de îfade kerd ke ciwanî eşkenê bi dîyalektanê kirmanckî û kurmancî ra muracat bikerê û vat: “Ma wazenê afirnayîşê kurdkî zêdeyîr bikerê. Na musabeqa zî do seba ziwanê kurdkî tesîrêk bikero. Wa heme ciwanî eseranê xo ma rê bierşawê. Her kede ke seba ziwanê kurdkî yena dayene zaf muhîm a. Ma paweyê tewrbîyayîşê ciwanan ê.”
Têgêrayîşê Komeleyane Wendekaran ê Kultur û Ziwanê Kurdkî (TEV-KOM) do musabeqaya hîkaye û şîîranê kurdkî virazo. Musabeqa bi dîyalektanê kurmancî û kirmanckî yê kurdkî yena virastene. TEV-KOM’î derheqê musabeqaye de afîşêk bi sloganê “Bêvengîya zerreyê xo bikerê vengê şarê xo” vila kerd. Ganî muracatê musabeqaye 15ê êlule de biqedîyêni la waştîşan ser o, muracatî hetanî 30ê êlule ameyê dergkerdene. Ciwanê ke emrê înan mabênê 17-30 serrî de yo, eşkenê muracat bikerê û tewrê musabeqaye bibê. Endamê TEV-KOM’î Omer Bayraktarî derheqê musabeqaye de qiseykerd.
‘Ma paweyê eseranê embazan ê’
Omer Bayraktarî dîyar kerd ke TEV-KOM seba koordînasyonê wendekaranê unîversîteyan ame awankerdene û vat: “Ma waşt ke kurdkî zêdeyîr bêro vînayene û afirnayîşê virazîyê. Xeylî grûb û wendekarî bin banê TEV-KOM’î de ameyê têhet. Sey TEV-KOM’î, ma musabeqa virazenê. Na musabeqaya ma zî do bibo xebata ma ya ke heme şar û ciwanî tewrê musabeqa bibê. Musabeqaya ma musabeqaya şîîre û hîkayeyan a. Ciwanî eşkenê bi dîyalektanê kirmanckî û kurmancî yê kurdkî muracat bikerê. Heta nika xeylî eserî ameyê erşawitene. Xeylî ciwanî ma reyde kewtî têkîlîye û waşt ke wexto peyên yê muracatî bêro dergkerdene. Coka ma do hetanî 30ê êlule muracatan bigêrî. Ma paweyê eseranê embazan ê.”
‘Ma wazenê ziwanê kurdkî aver berê’
Omer Bayraktarî îfade kerd ke ê bi na musabeqaye wazenê ke ciwan seba pawitiş û domnayîşê kurdkî xo motîve bikerê û wina qiseykerd: “Ma wazenê wayîrvejîyayîşê kurdkî hîna zêdeyîr bikerê. Na musabeqa bi na hawa zî seba averşîyayîşê ziwanê kurdî tesîr kena. Eserê ke seba muracatî ameyê erşawitene xeylî baş ê. Bi çalakîyanê winasî, ma wazenê rayîrê xurtbîyayîşê ziwanê kurdkî hîra bikerê.”
‘Ma paweyê tewrbîyayîşê ciwanan ê’
Omer Bayraktarî dîyar kerd ke ê do rojanê ameyoxan de zî ziwanê kurdkî ser o xebatanê xo reyna bidê destpêkerdene û vat: “Ma mîyanê xo de xebatanê xo ser o munaqeşe kenê. Goreyê munaqeşe û prensîbanê ma, ma do çalakî û programê ke ziwanê kurdî ser o tesîr kenê virazê. Amancê ma ziwan û piştîdayîşê ciwanan o. Kamcîn xebat ma biresno nê amancî, ma do virazê. Wa heme ciwanî eseranê xo ma rê bierşawê. Her kede ke seba ziwanê kurdkî yena dayene xeylî muhîm a. Ma paweyê tewrbîyayîşê ciwanan ê.”
