Bi nêzdîbîyayîşê serrgêra 4. ya qetilkerdişê cinîya kurde ya ciwane Jîna Emînî, Îttîfaqê Partîyanê Sîyasî ê Kurdîstanê Îranî veng da şarê Rojhelatî ke roja 16ê êlule de dest bi grevê pêroyî bikerê.
Jîna Emînî paytextê Îranî Tehran de bi maneya “goreyê qeydeyanê xotêrapiştişî tênêgêraya” hetê polîsanê exlaqî ra ameye destbendkerdiş û dima ra bi îşkence ameybî qetilkerdiş. Serê nê qetlîamî ra 4 serrî derbaz benê.
Bi nêzdîbîyayîşê serrgêra qetilkerdişê Jîna Emînî, Îttîfqê Partîyanê Sîyasîyan ê Kurdîstanê Îranî eşkerayîyêk nuştekî weşêna û roja çarşemeyî ya 16ê êlule de temamê Rojhelatê Kurdîstanî de vengdayîşê grevê pêroyî kerd.
Îttîfaqî waşt ke seba paştdayîşê grevî esnafî dikananê xo û bazaran bigîrê, hemwelatîyî zî keyeyanê xo de bimanê û tewrê çalakîye bibê. Eşkerayîye de veng dîya partîyanê sîyasîyan, rêxistinanê komelê sîvîlî û komanê komelkî yê cîyayan ke paştî bidê grevê pêroyî.
Îttîfaqî dîyar kerd ke grevê pêroyî tena vîrardişê canfedayanê cangorîyanê xoverdayîşê “Cinî Cuye Azadîye” nîyo, eynî wext de çalakîyêka sîvîle ya aştîyane ya ke xoverdayîşê şarê Kurdî û waştişanê ci yê sîyasî û neteweyî nîşan dana.
Badê ke 16ê êlule 2022î de Jîna Emînî ameye qetilkerdiş, seraserê Îranî de protestoyê ke mîsalê înan nêameyê vînayene dest pêkerdî, slogana “Cinî Cuye Azadîye” sînorê welatî derbaz kerd û seraserê dinya de bîye yew sembolanê têgêrayîşê protestoyî.
