Hemşaredaro verên ê Şaredarîya Amedî ya Şaristanê Girdî Selçuk Mizrakli ke Hepisxaneyê Girewteyî yê Emnîyetê Berzî yê Tîpê Fyî yê Edîrneyî ra ame tehlîyekerdene, Teyaragehê Amedî de hetê Hemşaredara Şaredarîya Şaristanê Girdî Serra Bucak, parlamenter, hemşaredarê şaredarîyanê qezayan û hemwelatîyan ra ame pêşwazîkerdene.
Hemşaredaro verên ê Şaredarîya Amedî ya Şaristanê Girdî Selçuk Mizrakli ame Amed ke Hepisxaneyê Girewteyî yê Emnîyetê Berzî yê Tîpê Fyî yê Edîrneyî ra ame tehlîyekerdene. Seba Mizraklîyî Teyaragehê Amedî de pêşwazî ameye kerdene. Pêşwazî de Hemşaredara Şaredarîya Amedî ya Şaristanê Girdî Serra Bucak, Hemverfekê Meclîsê DBByî Demet Ceylan û Ayhan Karatekîn, hemşaredarê şaredarîyanê qezayan, parlamenterî, endamê meclîsî, Hetkarê Sekreterê Pêroyî yê DBByî Zerîn Turk, Muhabbet Erdogmuş û Ozlem Tekîn, serekê daîreyan, temsîlkarê partîyanê sîyasîyan û rêxistinanê komelê sivîlî û hemwelatîyan ca girewt.
‘Ganî haştî bikewa vîrê komelkî’
Mizraklîyî bernameyê pêşwazî de bi vateyê “Merheba şaristanê vîr û herkerdişî” dest bi qiseykerdişî kerd. Mizraklîyî derheqê Prosesê Haştî û Komelê Demokratîkî de erjnayîşî kerdî û dîyar kerd ke ganî rayîrê çareserîyêka haştîwaz, demokratîk û birûmete de îsrar bêro kerdene. Mizraklîyî îfade kerd ke haştî tena wexto ke bikewa heme hetanê komelî û vîrê komelkî û eynî wextî de wayîrê xusûsîyetêk bo ke ameyoxî awan bikera, do manaya xo ya rastîye bivîna û bale ante muhîmîya ci ser o ke no proses zemînêko bawerîdayox û rastî de aver şêro.
Mizraklîyî ard ziwan ke goreyê heqê wayûbirayî û haştî, resayîşê sîyasetmedar û tepîşteyan ê hepisxaneyan bi azadîya xo zî, elemananê muhîman ê prosesî ra yew o.
