Stenbol de seba şehîdanê Kurdîstanî qezayanê Sancaktepe û Başakşehîr de şîn ame ronayene. Mûsa Şanak o ke badê 30 serran zîndan ra ame veradayene, şîn de qiseykerdişê xo de û dîyar kerd ke eke ewro ê eşkenê behsê aştîye bikerê, no bi sayeyê şehîdan o.
Bi rayberîya Komela Yewî Kultur Piştgirî û Hetkarîya Keyeyanê ke Merdimê xo Derguşê Şaristanîye de Vîndî Kerdî (MEBYA-DER) ê Stenbolî seba şehîdanê Têkoşînê Azadîya Kurdîstanî yê ke wextê cîyayan de cuya xo ra bîyî qezayanê Sancaktepe û Başakşehîr de şîn ame ronayene. Keyeyê şehîdanî Dayîkê Aştî, endam û rayberê partîyanê sîyasîyan, temsîlkarê dezgehanê sîvîlan û xeylê welatijî tewrê şînî bîyî. Şînan de masayanê ke ser o fotografê şehîdan, Rayberê Şarê Kurdî Abdullah Ocalanî bîbî gulî ameyê ronayene. Sewbîna sey pankartê “Ma şehîdanê rûmetî vîr anê” ,”Şehîdê ma rûmetê ma yê”, “Têkoşînê înan rayîrê ma roşn kenê”, û “Şehîdî Nêmirenê” ameyê daleqnayene. Program qezaya Sancaktepe de seba şehîdan bi deqîqeyêke rêzgirewtiş dest pêkerd.
‘Ewro eke ma eşkenê behsê prosesî bikerê bi sayeyê şehîdan o’
Dima rêzgirewtîşî Mûsa Şanak o ke dima 30 serran û 7 aşman zindan ra vejîya bi, qisey kerd. Mûsa Şanakî dîyar kerd ke ê şexsê şehîdan de kesanê ke seba azadîya Kurdîstanî kede daye vîr anê û vat: “Sereyê şarê Kurdî û Rayberê Şarê Kurdî Abdullah Ocalanî weş bo. Dayîkanê Kurdan zaf dej ant, wexto ke domanê înan dinyaya xo bedilnayê û ameyî girewtene, dejê înan hîna zêde bi.
Şehîdanê ma seba çi hende kede da? Şehîdanê ma seba cuyêka azade canê xo dayî. Senî dinyaya xo bedilnayî? Hayrî Durmuşî vatbi wa serê mezelê min de binûsîyo ‘ez deyndarê şarê Kurdî ya’, Zîlane vat, ‘Wereka ganê min ra zêdeyêrî çîyêk bibîyane ke min bidayene’. Bi serran Serekî seba aştîye zaf hewl da labelê cewab nêame dayene. Ewro eke ma eşkenê behsê aştîye bikerê û prosesêke ameyo dest pêkerdene, bi sayeyê şehîdan o. Ewro ber abî, nika ra tepîya ma do game bi game aver şêrê.”
Badê Mûsa Şanakî, keyeyanê şehîdan qisey kerd û dîyar kerd ke seba înan şehîdî nêmirenî û ganî her kes layîqê şehîdê xo bimano.
Dima qiseykerdişan, sînevîzyono ke seba vîrardîşê şehîdan amade bîbî ame temaşekerdene û bi wendişê mewlidî şîn dewam kerd.
