Ankara – Parlamentera DEM Partî ya Şirnexî Newroz Uysal Aslane da zanayene ke seba vatişê “Birêz Ocalan” verdayîşê tepîşteyê sîyasî Alî Adimanî 6 aşmî ame taloqkerdene. Aslane taloqkerdişê verdayîşê Adimanî Wezîrê Edaletî Akin Gurlekî ra persa.
Tepîşteyê sîyasî Alî Adiman ke Hepisxaneyê Tîpê Fyî yê Boluyî de tepîşte yo, waştişnameyanê xo de ke Wezaretê Edaletî rê şawitî “Birêz Ocalan” nuşto û coka cezaya hucreyî ey rê ameya dayene. Adimanî cezaya xo ya 30 serrî temam kerda zî verdayîşê ey bi bahaneyê cezaya hucreyî 6 aşmî ame taloqkerdene. Aslane derheqê nê taloqkerdişî de pêşnîyazêkê persî da Wezîrê Edaletî Akin Gurlekî.
Aslane pêşnîyazê persî de îfade kerd ke hepisxaneyan de heqê tepîşteyan bi cezayanê dîsîplînî yenê binpaykerdene û bi taloqkerdişê verdayîşî zî heqê înan ê azadîye yeno binpaykerdene. Aslane ard vîrî ke Mehkemeya Heqanê Merdiman a Ewropa (MHME) derheqê cezayanê hucreyî de ke seba vatişê “Birêz Ocalan” ameyê dayene, zaf rey qerarê binpaykerdişî dayo.
Aslane sewbîna da zanayene ke eke vateyêko ke hetê huqûqî ra sûc nîyo bibo bahaneyê cezaya hucreyî no binpaykerdişê huqûqî yo. Goreyê Aslane qerarê Dadgehê Berzî reyde zî hepisxaneyan de bêhuqûqîyê winasî dewam kenê.
Aslane Wezîrê Edaletî ra persa ke çira vateyêko ke sûc nîyo hepisxaneyan de beno bahaneyê cezaya hucreyî û dîsîplînî. Aslane îfade kerd ke zaf parlamenterî seba Abdullah Ocalanî vateyê “birêz” xebitnenê û persa: “Gelo goreyê wezaretê şima ganî êyê ke vateyê ‘birêz’ xebitnenê cezaya hucreyî bigîrê û bi serran hepisxaneyan de bimanê? Seba vatişê ‘Birêz Ocalan’ çend tepîşteyan cezaya hucreyî girewta û verdayîşê înan ame taloqkerdene?”
