Dewijan û ekolojîstan, ke Daristanê Akbelenî de vera madenî têkoşîn kenê, venga piştîpêdayîşê girseyî da.
Serra 2019î ra nat, Daristanê Akbelenî de (Îkizkoy, qezaya Milasî ya Muglayî) seba ardişê komirê lîgnîtî Santralanê Termîkî yê Yenikoy-Kemerkoyî rê çalakîyê madenî yenê kerdene. Wazîyeno ke cayê madenî, ke tede darê zeytunan û darê çamî est ê, bêro hîrakerdene.
Labelê dewijan û ekolojîstan ra xoverdayîş vera cayê madenî dewam keno. Hemwelatijan, ke Daristanê Akbelenî de derheqê babete de eşkerayîyêk daye, venga piştîpêdayîşî da. Înan vat ke piştîpêdayîş muhîm o, cayê ciwîyayîşê xo nêverdanê û vera madenî xoverdayîşê ma dewam keno.
Dewijanê Akbelenî hesabanê xo yê dîjîtal de eşkerayîyêk da, vat ke ê heşt serrî ra nat seba herdê xo têkoşîn kenê û vat:
“Ma no herd bi çi bedelan qezenc kerd. Heşt serrî ra nat bi çi bedelan pawenê. Eke lazim bo, ma do bedelanê newîyan bidê. Merdimo ke welatê xo ra hes keno, senî eşkeno yew bostê herdê xo ra fek verado? Kes mefikirîyo ke ma nê serran ra pey rincanbîyî û herdê xo ra fek veradanê. Kes huqûqî medo pişta xo û herdê ma û kedê ma gasp kerdene dima mekewo.”
