AMED – Amed Çermûg de awê kanalîzasyonî rasteraşt rijînê Awa Çermûgî. Şarê Çermûgî seba sihet û istiqbalê xo dezgehê awguznayîşî wazeno û vano: “Mecburîyeta ma ya awguznayîşî est a endî ma nêeşkenê peygoş bikerê.”
Qezaya Amedî Çermûg de awê kanalîzasyonan raşteraşt şinê mîyanê awa Çermûgî û çinebîyayişê dezgehê tesîsê Awguznayîşî ser o hetê şarê Çermûgî beyanatê çapemenîyî ame dayene. Eşkerayîya çapemenîye verê Pirdê Haburmanî de ame kerdene û şarê Çermûgî peşengî kerd. Eşkerayî hetê Serekê Muhtaranê Çermûgî Fadil Şekerî ra ame wendene. Fadil Şekerî bale ante qirêjîya dormeyî û rîskanê sihetê şarî ser o; hem zî Şaredarîya Amedî ya Şaristanê Girdî û rayedaranê DÎSKÎyî rê vengdayîş kerd.
‘8 cayanê cîyayan ra awê kanalîzasyonî şinê awa werî ser’
Fadil Şekerî eşkerayî wende û dîyar kerd ke awê kanalîzasyonê Çermûgî 8 cayanê cîyayan ra kona mîyan awanê derî û wina vat: “Awê atikî yê ke şinê awa derî de mergê masîyan beno. Hemwelatî nê awe de asnaw kenê, masîyan tepîşenê û heto bîn ra zî aweyûkewtişê ziraatî reyde berê ke benê, bazaranê qeze de yenê rotene.”
‘Qezayanê bînan de esto, çira Çermûg de çinîyo?’
Fadil Şekerî tesîsê awguzarîye yê qezayanê bînan ê Amedî mîsal nîşan da û reaksiyonê xo wina mojna: “Qezayanê merkezî ê Amedî de binasazîya awguzerîye esta. Qezaya Gêlî de 2017 de, Bismil de 2022 de, Hêni de 2024 de û Pîran de 2025 de dezgehê awagere / awê atikî virazîyaye. Seba Erxenî prosesê îhale dest pêkena, seba Farqînî zî xebatî yenê kerdene. Çira Çermûg de çinîyo? Çermûg çira serran ra nat paweno? Sihetê şarê Çermûgî, sihetê merdimanê qezayanê bînan ra bêqîmet o?”
Fadil Şekerî waştişê xo wina temam kerd: Cayê dezgehê awguzerîye, butçe, tarixê îhaleyî û meqsedê virazîyayîşî ganî diha verê raya pêroyî de bêro eşkerakerdene. Qiseyê seba pawitoxê hemsengîya ekolojîkî ganî vatişî de nêmanê, seba xelaskerdişê Awa Çermûgî ganî gamê raştikên bêrê eştene. Fadil Şekerî vat ke heta ke waştişê înan bêrê caardene, têkoşînê înan ê legal û demokratîk dewam bikero.
Dima ra hemwelatî Mehmet Selim Karayî qisey kerd. Ey zî muhîmîya ekolojî ser o bale ante û vat ke no problem ganî bêro çareserkerdene.
