Platformê Pawitiş û Yewbîyayîşê Bajarê Amedî bi wesîleyê 1ê êlule Roja Haştîye ya Dinya eşkerayîye da û vat: “Çareserkerdişê meseleya kurdan gamêka zaf muhîme ya ke do Tirkîya de standardê demokrasî berz bikero; coka ma venga heme beşanê komelî danê ke seba haştîyêka menda bilezabez gaman bierzê.”
Meydanê Şêx Seîdî de eşkerayîye ame dayene; temsîlkerdox û îdarekerdoxê partîyanê sîyasîyan, dezgehanê sîvîlan û aktîvîstê TJAyî tewrê ci bîy. Metnê tirkî Hemserekê ÎHDya Amedî Ercan Yilmazî û metnê kurmanckî endama Platformî Dîlan Guvençe wend.
Dîlan Guvençe vat şer û pêkewtişê ke heta ewro qewimîyayî, heqê cuye ra bigîre heta heqê azadîya fikr û îfade, heqê perwerde û weşîye, heqê bi mîlyonan merdiman binpay kerdî: “Nê şerî sebeb bîy ke komelan ser o travmayê giranî bivirazîyê. Rojhelato Mîyanên herêmanê ke tarîx de tewr zaf ji şer û pêkewtişan zerar dîyo ra yew a. Ma amadebîyayîşê xo ragihnenê ke seba haştîyêka menda heme gamanê hewceyan bierzê û ma venga heme hetanê ke dewamê nê şeran de berpirsîyar ê danê ke ê zî bi eynî hesasîyetî hereket bikerê.”
Guvençe vat: “Se serrî yo seba ke heqê kurdan nîno qebulkerdene, prosesêko pêkewtişî yo giran ê 40 serran ame ciwîyayene. Averşîyayîşê ke prosesê muzakere de teşrîna verêne 2024î ra nat qewimîyayî, muhîm ê. La eşkera yo ke meseleya kurdan-ke kokê aye verê awankerdişê Komara Tirkîya de yê-tena bi qedîyayîşê şîdetî nîna hewanayene.”
Guvençe bale ante Qanûnê Çarçewa ser o ke 10ê tebaxe 2026î de bi 468 rayan ame qebulkerdene û 18ê tebaxe de Rojnameyê Fermî de ame weşanayene: “Bi nê qanûnî qerar ame girewtene ke cipersayîş, dawa û qerarê mehkumîyetî yê ke PKKyî reyde girêdaye yê, seba demanê dîyarkerdeyan bêrê taloqkerdene. La goreyê madeya 3. ganî qerarê Heyeta Asayîşê Mîlî Rojnameyê Fermî de bêro ragihandene û na mecbûrîye nika vernîya caardişê qanûnî de bîya asteng. Ma sey gamêka goreyê ruhê prosesî erjnenê ke Serekkomar venga Heyeta Asayîşê Mîlî bido kombîyayîşêka awarte. Îhtîmal o ke çarçewaya nê qanûnî de bi hezaran hemwelatî newe ra tewrê cuya komelkî bibê.”
Guvençe dîyar kerd ke ganî tayînkerdişê qeyûman biqedîyo, hemserekê şaredarîyan peyser şêrê karê xo û qerarê AÎHM û Mehkemeya Anayasa bêrê caardene: “Caardişê reformanê demokratîkan ke bêçekbîyayîşî reyde paralel şinê, do bawerîya komelanê Tirkîya bi fikrê haştîye zêde bikero. Bitaybetî nêzdîbîyayîşê meseleya kurdan tena bi perspektîfa asayîşî sebeb bîyo parebîyayîşê komelkî. Hemleyê vera karkeranê kurdan ê demsalî û qewimîyayîşê maçanê Amedsporî nimûneyê fehmê nîjadperestî yê.”
Guvençe peynî de vat: “Ganî heme fikrê sîyasî yew hetî bêrê nayene û heme kesê ke haştîye wazenê bêrê têhet. Çareserkerdişê meseleya kurdan gamêka zaf muhîme ya ke do standardê demokrasî berz bikero. Bijî Aştî.”
