Amed – Torra Amedî ya Têkoşîna Vera Şîdetî, zêdebîyayîşê tundî û qirkerdişê cinîyan vera nobeta “Cinî, Edalet û Vîr” dest pêkerd û vat: “Ma wazenê ke cinî hema ke weşê bêrê pawitene û merdenê bi şikî bi hawêko hîna hîra bêrê cipersayene.”
Torra Amedî ya Têkoşîna Vera Şîdetî, zêdebîyayîşê qirkerdişê cinîyan hewteya 3îne de Edliyeya Amedî ver de “Nobeta Cinî, Edalet û Vîr” dest pêkerd. Hemşaredarê qezayanê Amedî, rayberê partîyanê sîyasîyan, komelê cinîyan, temsîlkarê sazîyanê sivîlan û zaf cinî nobete de bîyî. Nobete do 10 hewtan bidomîyo. Nobete de pankarta “Cinî Nobeta Edalet û Vîrî Girewtenê” ame akerdene. Cinîyan nobete de tim sloganê “Cinî cuye Azadî”, “Qirkerdişê Cinîyan Sîyasî yo” û “Têkoşîna Cinîyan Pêt Bo” berz kerdî.
Eşkerayî hetê Berfîn Elçî, Endama Desteya Rêveberîya Şaxa Komela Heqanê Merdiman (ÎHD) ya Amedî, ra ame wendene.
Berfîn Elçî vat ke hedefgirewtişêko sîstematîk û domkerde yê vera cuyayîşê cinîyan “qirkerdişê cinîyan” o û vat: “No qirkerdiş, raştî û vera estbîyayîşê cinîyan ke wayîrê erjanê tarîxî û komelkî yê yo. Nê qirkerdişî xoser nîyê; encamê sîstemê nêrsalarîye û polîtîkayanê bêcezaverdîşî yê.”
‘Wexto ke delîlî nêbêrê komkerdene, qirkerdiş sey xokiştişî qebûl beno’
Berfîn Elçî dîyar kerd ke vîr ardiş her wext rayîrêk a seba heqê cuyayîşî pawitişî. Cinî nêseypêyîya zayendî ya komelkî û heme sazîyanê ke tundîya nêran pawenê ra vera têkoşîn kenê. Elçî vat ke edaleto ke ê wazenê, tena bi qerarê peynîya merdene rê sînordar nîyo, hîna hîrayêr o. Berfîn Elçî qiseyê xo wina domna: “Ma wazenê ke cinî hema pêt bêrê pawitene, serlêdayîşê tundîye ra vera sazîyanê dewlete yê têkilîdaran ra bêrê nirxnayene, merdenê ke tede şik est o her warî ra bêmabên bêrê cezakerdene û erkê pawitişî bêrê caardene. Merdenê ke şik tede est o ganî rast bêrê teqip kerde ke bêceza nêmanê. Meqamê erkdaran ganî teqip bikerê û şikî mîyan ra hewanê. Wexto ke merdenî bî ganî heme delîlî bêrê komkerdene, sey xokiştîş yan zî qeza bêro qebûlkerdene, şik nêverdeno; raştî tarîye de manena û berpirsîyarî bêceza manenê. Ma îta yê ke raştî tarîye de nêmano û kes vîr ra nêbo.”
Cuyayîşê cinîyan de tesîrê bêceverdişî
Berfîn Elçî bale ante ser ke gêrayîşê edaletî yê Fatmanur Çelîke hende ke est o zî, faîlê ke bi sûcê îstîsmarî dewa de ame darizayene, beraat bî; dewa êrişê cînsîye ya Sêwregî de zî hirê suckerdeyî ameyî veradayene. Berfîn Elçî dîyar kerd ke na yew reyna tesîrê polîtîkaya bêcezayî ser jîyayîşê cinîyan eşkera kerd û vat: “Êrişêko zayendî ra dima cinîye ra ame persene ‘çira to xo nêkişt’ mojnena ke cuyayîşê cinîyî yeno dariznayene. Pawitişê heqê cuyayîşê cinîyan çiqas bi astengkerdişê şîdetî mumkun o, hende zî vera şîdetî ra caardayîşê edaletî mumkun o.”
