Welatîyê Êlihî ke beşdarê çalakîya 1ê êlule Roja Haştîye ya Dinya bîyî, ard ziwan ke wazenê sey heme miletanê dinya wayîrê heqan bibê û vat ke ganî kurdî zî êdî sey her kesî wayîrê statuyî bibê.
1ê êlule Roja Haştîye ya Dinya de zaf bajaranê Vakurê Kurdîstan û Tirkîya de çalakî ameyî viraştene. Şarî bi waştişê haştîyêka menda beşdarê çalakîyan bî. Welatîyê Êlihî ke beşdarê çalakîye bîyî, vat ke wazenê biresê heqanê xo yê ziwan, kultur, nasname û komelkîyan û êdî nêwazenê tu may û pî bibermê.
“Ganî heme tepişteyî bêrê veradayene”
Sakîne Baytare vat: “Proses hêdî-hêdî aver şino, ma zî seba haştîyêka menda tîya de yê. Ma wazenê rojêk rewêr haştî seba herkesî biba û herkes bireso heqê xo. Ma wazenê Serokê ma û heme tepişteyê ma yê zîndanan bêrê veradayene.”
Razîye Arigtekîne zî vat: “Ma haştîyêka menda wazenê, ma nêwazenê kesî rê heqaret bibo û dayîkî bibermê. Ganî şarê kurdan zî sey her miletî wayîrê heqan bo.”
“Bawerîya ma tena bi Serokatî ya”
Saadet Acete ard ziwan ke nê prosesî de a tena bi Rayberê Şarê Kurdî Abdullah Ocalanî bawer kena: “Ma wazenê haştî verê Serekê ma û heme tepişteyanê ma rê bêro. Ganî êyê ke zîndanan de yê, serbest bêrê veradayene û biresê heqê xo yê azadîye. Ma wazenê haştîyêka menda ser o bi ziwanê xo qisey bikerê. Ma tu kesî ra bawer nêkenê, bawerîya ma tena bi Serokatî est a. Çîyo ke Serokatî tede bo, do bibo.”
“Hêvîya ma serkewtiş o”
Celal Akmanî vat ke seba ke Rayberê Şarê Kurdî Abdullah Ocalan mîyanê prosesî de yo, ê pê bawer ê: “Nê bedelê ke şarê kurdan 40-50 serrî yo dano, seba haştîyêka menda û wayûbirayîya heme neteweyan ê. Ma zî wazenê sey her miletê dinya bi nasname, ziwan, kultur û hunerê xo biciwîyê. Çîyo ke tirk, ereb û farisî xo rê wazenê, ganî seba kurdan zî bibo. Zaf kesî est ê ke wazenê nê prosesî xerepnê; wexto ke haştî çin bîye vatêne ‘çira haştî nêbena?’, nika ke proses est o, wazenê ey zî xerepnê. Eke rasta zî haştîye nêwazenê, koyê Kurdîstanî uca de yê, wa şêrê şer bikerê; la wexto ke şer bibo, remenê. Ma nêwazenê êdî zerrîya tu may û pîyî bideja. Ma bi şar û dewaya xo bawer ê.”
