STENBOL –Welatijê ke Stenbolî de tewrê vîrardişê şehîdan bîyî, dîyar kerd ke ê ewro bi saya şehîdan serberzê û wina vat: “Qehremanê ma seba azadîya xo û şarê xo têgêrayê. Ma bi saya şehîdan lingan ser o yê.”
Badê Têgêrayîşê Azadîya Kurdîstanî, şehîdê xo yê ke ca û tarîxanê cîyayan de cuya xo ra bîyî, eşkera kerd, Kurdîstan û şaristananê Tirkîya de progaramê vîrardişî viraşt. Bi hezaran welatijê tewrê programê vîrardişî benê û wayîrê şehîdanê Kurdîstanî vejîyenê. Stenbol de zî rojano ke xeylî qezeyan de programê vîrardişê û şînî virazîyê. Welatijê ke tewrê şînê şehîdan bîyî, ajansê ma rê qisey kerd.
‘Ma bi şehîdanê xo serberz ê’
Dayîka bi namê Kamîle Koç, bale ante muhîmîya têkoşînê Têgêrayîşê Azadîya ser û wina vat: “Ma bi saya şehîdan lingan ser o yê. Ma bi şehîdanê xo serberz ê. Wextêk ma leşkeran ver, dewan ra remayenê. Ma bi saya şehîdan ewro resayê na aste. Ma nêwazenê ke gedeyê ma şehîd bikewê. Ma verê şehîdanê xo de rêz gênê. Ma bindestîye qebul nêkenê. Heta peynîye ma lingan ser o yê. Wa heme şarê kurdî biresê heqê xo. Ma wazenê Serekê ma mîyanê ma de bo.”
‘Ganî ma rêça şehîdanê xo ser o bê’
Abdurrahîm Yildirim dîyar kerd ke şehîdî bawerîyêke yê û wina qisey kerd: “Kesê ke şêro herra kesêkê bînî îşxal bikero, nêbeno şehîd. Kesê ke bi pere şêro cayêko bîn û uca îşxal bikero, nêbeno şehîd. Menfeetê dinya bala qehremanan û û şehîdanê ma de nîyê. Qehremanê ma seba azadîya xo û şarê têgêrayê. Goreyê îmkananê xo, ganî ma rêça şehîdanê xo ser o bê.”
‘Zerrîya ma vêşena’
Dayîka Zahîde Îlbas îfade kerd ke ê aştîye wazenê û vat: “Ma waştişê aştîye kenê ke hendî wa kes şehîd nêbo. Zerrîya ma vêşena. Ma waştişê heqê xo û azadîya xo kenê. Ma waştişê azadîya Serekê xo kenê. Wa berê hepisxaneyan bêrê akerdene. Gerîla seba heqê şarê xo şîyê koyan û şehîd bîyê. Ma nêwazenê hendî gerîla şehîd bibî.”
‘Ma seba herre û şarê xo têkoşîn kenê’
Dayîka Gulbahar Avci zî dîyar kerd ke şehîdî seba înan her çîyî ra muhîmê rê û vat: “Ma seba welat û şarê xo têkoşîn kenê. Şehîdanê ma zî na rayîrî de cuya xo ra bîyî. Ganî ma zî wayîrê şehîdanê xo vejîyê. Ewro zerrîya pêro şarê kurdî vêşena. Ma aştîye wazenê.”
