Şaredarîya Amedî ya Şaristanê Girdî do kursê ‘Destpêkê Zanistê Etnomuzîkolojî’ yo ke muzîkî çarçewaya kultur, komel, tarîx, nasname û cuya merdiman de hesibneno, organîze bikera. Welatîyê ke 18 serre û serê ci de yê, do bieşkê mabênê 9-19ê temmuze de qeydê xo seba nê perwerdeyê teorîk virazê ke do 12 hewteyan bi kurmancî bêro dayenê.
Serekîya Dayîreyê Kultur, Huner û Karanê Komelkî, seba kesanê ke wazenê bi ewnîyayîşêko hîra û zanîstî nêzdîyê muzîkî bibê, kursê ‘Destpêkê Zanistê Etnomuzîkolojî’ dana destpêkerdene. Kurso ke seba qadê etnomuzîkolojî sey destpêk o ke muzîkî tena veng û melodîyan ser o nê, çarçewaya kultur, komel, tarîx, nasname, rîtuel û cuya merdiman de hesibneno, do firsend bido beşdaran ke term, teorî û nêzîkatîyanê bingeyênan ê nê lingê zanîstî bi hawayêko sîstematîk bimusê.
Kurs do 12 hewteyan de dewam bikero
Kurso ke do bi temamî bi tedeyîyêka teorîk bêro rayraberdene, do 3 aşman yanî 12 hefwteyan dewam bikero. Perwerdeyîyan de ke do her hewte sey roniştişêk bêro viraştene, ewil babetê sey ‘Etnomuzîkolojî çi yo?’, ‘Muzîk û kultur’, ‘Muzîk û nasname’, ‘Muzîk û komel’, ‘Muzîk û rîtuel’ û ‘Rêbazê cigêrayîşê etnomuzîkolojî de’ û xeylê babetê bingeyên ê nê ware do bêrê hesibnayene.
Dersî do bi kurmancî bêrê dayene
Zîwanê perwerdeyî yê kursî ke do hetê Mamoste Şoreş Mamlê ra bêro dayene, Kurdkî bo. Perwerdeyo ke do Merkezê Kultur û Kongre yê Çand Amedî de bêro dayene, seba wendekaranê muzîkî, cigêrayoxan, muzîkjenan, mamosteyan, heskerdoxanê muzîkî û her keso ke wazeno bi perspektîfêko zanîstî nêzdîyê muzîkî bo, akerde yo.
Muracatî mabênê 9-19ê temmuze de yê
Welatîyê ke 18 serre û serê ci de yê, do bieşkê muracatê kursî bikerê. Muracatî do mabênê 9-19ê temmuze de bêrê kerdiş.
Qeydê kursî do nê adresî ser o bêrê girewtiş: https://dismek.diyarbakir.bel.tr
