Badê ke Amedspor vejîya Lîgê superî, eleqeyê terefgîran hîna zêde bîyî û seba ke bieşkê stadyum de maçanê Amedsporî temaşe bikerê ganî serê aplîkasyonî Passo ra bîlet biherînê la mîyanê çend deqîqeyan de bîletî qedênê û xeylê kesî bê bîlet manenê. No zî beno sebebê nerazîbîyayîş û spekulasyonan. Naye ser ewro klûba Amedsporî hesabê xo yê X’î de eşkerayîyêke daye û vengdayîş kerd.
Eşkerayîya klûba Amedsporî wina ya:
“Terefgirê ma yê erjîyayeyî; prosesê rotişê bîletanê maçanê klubê ma tena aplikasyonê Passo ser o yeno rayraberdene. Naye ra teber, tu platform, keyepelê înternetî, hesabê medyaya dîjîtal de yan zî bi rayîranê kesanê bînan ra rotişê bîletan yê resmî nêbeno.
Seba ke vernîya rotişê bîletan ê karaborsa û hewldayîşê sextekarîye bêro girewtene, sewbîna seba ke tarafgirê ma rastê zehmetîyan nêrê, transferkerdişê bîletan ameyo padayene. Transferê bîletî tena bi destê klûbe eşkeno bêro kerdene. Bîletê ke seba klûbe yenê transferkerdene, badê ke prosesê transferî temam bî, reyna seba rotişî yenê pêşkêşkerdene.
Ma rica kenê, no program ra teber, taybetî platformanê medyaya dijîtal û rayîrê bînan yê têkilîyan de mesaj û raçarnayîşê ke derheqê rotişê bîletan de yenê parekerdene, bi tu şeklî bawer mêkerê.
Seba ke terefgirê ma raştê tu zehmetîyan nêrê, zaf muhîm o ke herînayîşê bîletan tena Passo ser o û goreyê agahîyanê ke kanalanê resmîyan ê têkilîye yê klûbê ma de yenê eşkerakerdene, bêro kerdene. Bi rêz û hurmet, Klûba Amedsporî.”
