Îzmîr – Îdareyê portalê xeberan “Manşetiz”î hem dekewtişê sîstemê xeberan rojnamegeran rê pada hem zî bi bahaneyê “nêameyê kar” rojnamegerî kar ra vetî. 12 rojnamegeran ke aşman o meaşê înan nêyeno dayene, venga piştîdayîşî da.
Îzmîr de 12 rojnamegerê ke portalê xeberan “Manşetiz” de xebitîyêne, badê ke meaş û heqê kartanê werdî yê nêdayeyî waştî, kar ra ameyî vetiş. Ame dîyarkerdiş ke meaş û heqê kartanê werdî yê edîtor û muhabîranê Manşetizî aşman o erey yenê dayîş. Xebatkaran îfade kerd ke badê ke heqê xo waşto, îdareyê şirketî ê kar ra vetê.
‘Hem dekewtişê portalî pada hem zî vat nêameyê kar’
Goreyê eşkerayîya hempare ya rojnamegeran, 11ê teşrîna verêne de xebatkarî seba ke dest bi mesaîye bikerê şîyî verê kompîtoranê xo. Înan dî ke nêşenê bikewê sîstemê xeberan. 12 rojnamegeran dîyar kerd ke ê hazir bî ke bixebitîyê la semedê padîyayîşê sîstemî nêeşkayî wezîfeyanê xo bîyarê ca. Înan dîyar kerd ke hîrê rojî pawitê zî bi bahaneyê “nêameyîşê karî” goreyê Kodê 48. kar ra ameyê vetene. Eşkerayîye de ame dîyarkerdiş ke rayber Tahir Aygunî xebatkaran rê ke meaşê xo waştêne, wina cewab dabî: “Wexto ke pereyê mi bibê, ez do bida.”
‘Ma do têkoşînê xo yê huqûqî û rêxistinî dewam bikerê’
Rojnamegeran ke kar ra ameyê vetene, îlan kerd ke heta ke heme meaşê înan nêrê dayene, do têkoşînê xo yê huqûqî û rêxistinî dewam bikerê. Rojnamegeran venga rêxistinanê meslekî yê çapemenîye, hemkaranê xo û raya pêroyî da ke piştîdayîşê înan bikerê.
