Roniştişo 11. ê dewaya ke tede 20 rojnameger û xebatkarê çapemenî bi îdiaya ‘endamtîya rêxistine’ yenê muhakemekerdiş, mehkemaya Amedî de virazêna. Mehkema badê pawitişan, dosya erşawit dozgerîye ke mutaalaya xo hedre bikerê û roniştişî taloqê aşma teşrîna peyêne kerd.
Roniştişo 11. ê dewaya ke tede 20 rojnameger û xebatkarê çapemenîya kurd semedê falîyetanê xo yê rojnamegerî û bi îdiaya ‘endamtîya rêxistine’ yenê muhakemakerdiş, Mehkemaya Cezayanê Giranan a Amedî ya 4. de ame viraştiş. Mehkema, waştişê avûkatan ê seba wedaritişê kontrolê edlî red kerd û dosya seba hedrekerdişê mutaalaya peyîne dozgerîye rê erşawit .
Rojnamegerê sey Serdar Altan, Mehmet Alî Ertaş, Azîz Oruç, Zeynel Abîdîn Bulut, Omer Çelîk, Mazlum Dogan Guler, Îbrahîm Koyuncu, Neşe Toprak, Elîf Ungur, Abdurrahman Oncu, Mehmet Şahîn, Lezgîn Akdenîz, Suat Doguhan, Ramazan Gecîken, Esmer Tunç, Mehmet Yalçin, Kadîr Bayram, Remziye Temel, Berîvan Karatoprak û Servet Yîgen yenê muhakemekerdiş. Roniştişê na dewa Mehkemaya Cezayanê Giranan a Amedî ya 4. de ame viraştiş.
Roniştişo 11. de, avûkat Resul Temur û rojnameger Elîf Ungur salone de hedre bîyî. Sewbîna temsîlkarê Komela Rojnamegeran a Dîcle Firatî (DFG) zî seba piştîdayîşî roniştişî taqîb kerd.
Avûkat Resûl Temur roniştîşî de îfade kerd ke astengîyê rojnamegeren ser o sey qedexeyê vejîyayîşê teberî, falîyetanê rojnamegerî asteng keno û waşt ke no şert bêro wedaritiş.
Mehkema roniştî taloqê aşma teşrîna peyêne kerd
Heyetê mehkema badê goştarîkerdişê pawitişan, waştişê wedaritişê kontrolê edlî red kerd û qerar da ke qedexeyê vejîyayîşê teberî yê rojnamegeran ser o do dewam bikero. Mehkema, seba ke dozger, mutaalaya xo ya esasê dawa ser o yan ewnîyayîşê xo o peyîn seba ceza yan zî seba beraatî pêşkeş bikero, dosya teslîmê dozgerîye kerd.
Roniştişo 12. ê dewa taloqê 10ê teşrîna peyêne ame kerdiş. Yeno pawitiş ke roniştişê bînî de , dozger mutaalaya xo biwano û dewa ver bi qerardayîşî ya şêra.
Vîyarteyê dewa
Na dewa 8ê hezîrana 2022î de sereştişê keye û sazgehê çapemenî yê Amedî dest pêkerd. Netîceyê operasyonî de 20 rojnamegerî ameyê destbendkerdiş û badê 8 rojan, înan ra 16 kesî ameyê girewtiş. Rojnamegerî, bê îdianname, serrêk ra zafêr hepîsxane de mendê. Roniştişo yewin de ke temmuza 2023î de ame viraştiş, heme rojnamegerî bi şertê kontrolê edlî, qedexeyê vejîyayîşê teberî, ameyê veradayîş. Îdianame de, programê tv, xeberê ke ameyê viraştiş, kemerayê weşanî û wasitayê rojnamegerîye sey ‘delîlê sucdarîye’ ameyê mojnayîş.
