Hemserekê Pêroyî yê DEM Partî Tuncer Bakirhanî dîyar kerd ke qanûnê çarçewa ganî seba demokratîkbîyayîşê Tirkîya bingeyêko xurt awan bikero û vat: “Ganî êdî statuyê rêzdar Ocalanî bêro dîyarkerdiş. Ganî mekanîzma bêra awankerdiş. Ganî bingeyê qanûnanê entegrasyonê demokratîkî bêro awankerdiş.”
Hemserekê Pêroyî yê DEM Partî Tuncer Bakirhanî kombîyayîşê grûbê partîya xo ya Meclîsî de qisey kerd.
Tuncer Bakirhanî destpêkê qiseykerdişê xo de qurbanîyê Qirkerdişê Pirsûsî sergêra 11. de yad kerdê û îfade kerd ke ê do nê qirkerdişî xo vîr ra nêkerê û nêdê xo vîrrakerdiş û sey partî heta kiştoxî bêrê muhakemekerdiş çi destê înan ra bêro ê do bikerê.
‘Şarê Rojhelatî tena nîyo’
Tuncer Bakirhanî vera hêrişanê Îranî yê vera kurdan reaksîyon mojna û vat: “Amerîka hêrişê Îranî keno labelê Îranî zî bi nê hêrsî hêrişê kurdan keno. 9 pêşmergeyê Komeleyî cuya xo vîndî kerd. Hêrişê Herêma Kurdîstanî kenî. Çi eleqeyê Herêma Kurdîstanî bi nê hêrişan de est a. Sewbîna kurd û muxalîfî yenî dardekerdiş. Ma şarê Rojhelatê Kurdîstanî rê serweşîye wazenî. Wa rejîmê Îranî zaf rind bizano ke şarê vakurî hetê şarê Rojhelatî de yo. Ma nê qirkerdişan xo vîr ra ra nêkenî. Kurdî kurdê verênî nîyê. Hêzo tewr dînamîk ê Rojhelatê Mîyanên ê. Bi hêrişanê vera kurdan kes nêeşkeno netîce bigêro. Ma reyna rejîmê Îranî hişyar kenî ke nê hêrişan ra fek verado.”
Krîzê aborî
Tuncer Bakirhanî dewamê qiseykerdişê xo de bal ant krîzê aborî yê Tirkîya ser o û wina dewam kerd: “Bi mîlyonan hemwelatî rîyê vaybîyayîşî ra nêeşkenî debara xo bikerê. Hemwelatî veşanîye reyde rî bi rî yê. Hemwelatîyê teqawîtî binê sînorê vêşanîye de meaş gênê. Labelê îqtîdar vano çimeyî çin ê. Labelê no meseleyê çinbîyayîşê çimeyan nîyo. Çimeyan seba sermayedaran abirnenê. Ma zî vanî wa bi pîze vêşan behsê aştî nêro kerdiş. Ganî edaletê komelkî bêro ca.”
‘Qanûnê çarçewa destpêkêko newe yo’
Tuncer Bakirhanî dîyar kerd ke vengdayîşê 27ê sibate berêko newe akerd û wina dewam kerd: “Seba awankerdişê Tirkîyaya demokratîke qonaxo muhîmqa nûnê çarçewa yo. Qanûnê çarçewa destpêkêko newe yo. Ganî qanûnê çarçewa bilez bêro vetiş û goreyê mutabakatêk bêro ca. Vizêr heyetê ma rêzdar Abdullah Ocalanî reyde pêvînayîş kerd. Heme şaranê Tirkîya rê silamê xo erşawitê. Rêzdar Ocalan vano, ‘Eger ti kurdan ra tirkan vejê, kurdî nêmanenê, eger ti Kurdan ra tirkan bivejê tirkî nêmanenê’. Rêzdar Ocalan reyna behsê heqîqetê çareserîye keno. Rêzdar Ocalanî gamê tewr radîkalî eştî. Labelê çi heyf ke gamê ke vera nê gamanê radîkalan ameyî eştene hetê dewlete ra yenî ereyvistiş. Pêvînayîşê heyetê ma ê îqtîdar û rêzdar Bahçelî reyde domnayîşê prosesî de erênî bîyî. Labelê serê medya de rayraberdişê şerê taybetî goreyê ruhê prosesî nîyo. Ganî kes nêkewo na dame.”
‘Ganî statuyê rêzdar Ocalanî bêro dîyarkerdiş’
Tuncer Bakirhanî îfade kerd ke ganî statuyê Rayberê Şarê Kurdî Abdullah Ocalanî zî bêro garantîkerdiş û wina qisey: “Ganî qanûnê çarçewa heme kesan bigêro zereyê xo. Ganî êdî statuyê rêzdar Ocalanî bêro dîyarkerdiş û şertê ey bêrê sererastkerdiş. Ganî mekanîzma bêro awankerdiş. Ganî bingeyê qanûnan ê entegrasyonê demokratîkî bêro awankerdiş. Şuxulnayîşê qeyûman biqedîyo. Berê Nisebîn û Qamişloyî bêrê akerdiş. Mehkema zî goreyê prosesî têbigêrê. Qerarê Mehkemaya Heqanê Merdiman a Ewropa bêrê ca û girewteyê sîyasîyî bêrê veradayîş. Akademîsyenê ke KHK reyde kar ra ameyê durvistiş agêrê serê karê xo. Selahattîn Demîrtaş, Fîgen Yûksekdah û hemû girewteyê sîyasîyî bêrê veradayîş. Gamê winasînî seba prosesî eşkenî bêrê eştiş. Sey DEM Partî rayîrê ma komelo demokratîk û aştî yo. Seba ey zî ma 24 seetan xebitîyenê. Labelê ê ke vera prosesî yê, ê zî est ê. Sebebê problemanê bînageyîyan no şer o. Eger no proses ser kewo çend kesî do vîndî bikerê labelê bi mîlyonan kesî do ser kewê. Eger aştî nêba êdî ê ke ameyî weçînayîş nêyenî destbendkerdiş. Krîzê aborî do biqedîyo û do aramîya komelî bêra ca. Heqê dînî do bêrê ca. Yew dayîka leşkerî û ya gerîlayî do pîya ronişê. Ney ra weşêr çiyêk est o. Eger no problem çareser bo heme qadan de do averşîyayîş bibo. Seba ey zî gama yewine qanûnê çarçewa yo.”
Tuncer Bakirhanî derheqê pêvînayîşê Numan Kurtulmuşî reyde zî vat ke ê do pêşnîyazê xo yê serê qanûnê çarçewayî pêşkêş bikerê û vat: “Rêzdar Numan Kurtulmuş do bîro zîyaretê grûba ma û pêvînayîşî bikero. Ma do zî fikir û pêşnîyazanê xo pare bikerî. Ma na bawerîye de yê ke serekê Meclîsî rêzdar Numan Kurtulmuş do rolê xo ya pozîtîf nê prosesî de zî bidomno. Sey DEM Partî ma do sîyasetê cuya newîye awan bikerê.”
