Bursa de seba ke yew dikandarî deyirê Ahmet Kayayî goşdarî kerdêne, vera ey hêrişêko nîjadperest virazîya. Kesêko nîjadperest bi vatena “Ti deyîra kurdkî akenî?” hêriş kerd.
Bursa de yew dikanê çîgkofteyî de goşdarîya kilamanê Ahmet Kayayî ameyêne kerdene. Badê goşdarîya deyîran, dikandar rastê hêrişê kesê ke nîjadperestî ame. Hêrişkaro ke ame dikan, bi telefonê xo deqayê hêrişî qeyd kerd û serê hesabê xo yê medya dîjîtale de vila kerd. Nêame zanayene ke hêrişkar kam o.
Nê kesê nîjadperestî bi nê vatenan hêrişê dikandarî kerd: “Ti deyîranê kurdkî akenî? Ti koti ra yê? Ma Komara Tirkîya de ciwîyenê, şima nêşênî goşdarîya deyîranê Ahmet Kayayî yê ke vato ‘heta merg ma Kurd ê’ bikerî. Eger ti goşdarî bikerê, do tengezarî bivejîyo.”
