Hevserokê Giştî yê DBPê Keskîn Bayindir ku di 1emîn Kongreya Asayî ya DBPê ya Colemêrgê de axivî, da zanîn ku Rêberê Gelê Kurd Abdullah Ocalan Kurd ji asta mirinê derxist, navê Kurdan di qanûnan de bi cih kir û wiha got: “Peywîra me jî ev e ku bi zanîn, ilm, tifaq û rêxistinbûyîna xwe tev li vê pêvajoyê bibin.”
Rêxistina Partiya Herêmên Demokratîk (DBP) a Colemêrgê 1emîn Kongreya Asayî li eywaneke dawetê ya Colemêrgê li dar xist. Di eywanê de pankarta “Şehîd rêberên têkoşîna me ne” hat daliqandin û dirûşmên “Şehîd namirin” û “Bijî Serok Apo” hatin berzkirin. Hevserokê Giştî yê DBPê Keskîn Bayindir, endamên meclîsa DBPê Murat Sarisaç, Naziye Goren, parlementerên DEM Partiyê yên Colemêrgê, Dayikên Aştiyê, Hevşeradarên Geverê, endamên TJAyê, sazî û rêxistinên DEM û DBPê yên Gever, Şemzînan, Çelê û bi dehan welatî tev li kongreyê bûn.
‘DBP nasnameya Kurd e’
Hevserokê Giştî yê DBPê Keskîn Bayindir di kongreyê de axivî û anî ziman ku DBP nasname, çand û zimanê gelê Kurd e.
Keskîn Bayindir diyar kir ku ev 50 sal in ew ji bo mafên xwe têdikoşin û wiha got: “Pêwîst e em sazî û rêxistinên xwe ser vê mîrateya têkoşînê bi rê ve bibin. Di dîroka 50 salên têkoşînê de cihê ku rêberiya vê têkoşînê kiriye gelê Colemêrgê ye. Gelê Colemêrgê bi salan e bi reng, ziman, çand, nasname û têkoşîna xwe li ber xwe daye û heta vê demê hatiye.”
Nirxandina pêvajoyê
Di berdewama axaftina xwe de Keskîn Bayindir bal kişand ser pêvajoya ku ji aliyê Rêberê gelê Kurd Abdullah Ocalan ve hatiye destpêkirin û wiha pê de çû: “Bi vê pêvajoyê gelê Kurd bi têkoşîna xwe ya 46 salan êdî eşkere kiriye ku heta azadî û statûya xwe ne hilde vê têkoşîna xwe berdewam bike. Rêber Apo Kurd ji asta mirinê derxist û navê Kurdan di qanûnan de bi cih kir. Peywîra me jî ev e ku bi zanîn, ilm, tifaq û rêxistinbûyîna xwe tev li vê pêvajoyê bibin. Êdî Kurdan li her çar parçeyên Kurdistanê destê hev girtine û kes nikare vê lihevhatinê parçe bike. Ji bo ku em bi teqez û mayînde bigihêjin hemû mafên xwe divê em tifaqa xwe xurttir bikin.”
Piştî xwendina raporên xebatan Pinar Yilmaz û Fuat Taşkin ji bo hevserokatiyên DBPê yên Colemêrgê hatin hilbijartin.
Kongre bi dirûşmeyên “Bijî Serok Apo” bi dawî bû.
