Verfeka DEM Partî Ayşegul Dogane bale ante halê hepsîyanê nêweşan ser o û vat ke eke çîyêk bêro sereyê hepsîyanê nêweşan berpirsîyar dewlet a. Dogane qerarê Yeni Partî yê ca nêgirewtişê Komîsyonê Çimdarî de zî rexne kerd. Dogane da zanayene ke ganî hetanî nika seba Komîsyonê Çimdarîye bernameyêk dîyar bibîyêne û waşt ke Heyetê Aştî û Sîyasîbîyayîşî cade dest bi kar bikero.
Verferka DEM Partî Ayşegul Dogane derheqê averşîyayîşanê rojeve de Merkezê Pêroyî yê partîya xo de konferansêkê çapemenîye da. Dogane vat: “Keyeyê hepsîyan û sazgehê demokratîkî seba verdayîşê hepsîyanê nêweşan û heqê weşîye dest bi çalakîye kerd. Na nobete nobeta bêmudet a û her roje do dewam bikera. Hepsîyê nêweşî ke kanserî ra û nêweşîyanê giranan ra nêweş ê, nêyenê verdayene; ne tedawî benê ne zî yenê verdayene. Pê nê çîyan zî hepsîyê nêweşî nêameyî verdayene û hepsîyo nêweş Tuncer Saglam ganê xo ra bî. Ma zaf hêrsin ê.”
‘Dewlete do senî dayîkan rê hesab bido?’
Ayşegul Dogane dîyar kerd ke berpirsîyarê hepsîyanê nêweşan dewlete bi xo ya û vat: “Evîn Zapsû kanserê merheleya çarine ra nêweş a, halê aye giran o. Newroz Bozkurt zî losemî ra nêweş a û halê aye giran o. Dayîka Newroz Bozkurte, Sultan Bozkurte çalakîye de verê Wezareta Edaletî de vana: ‘Dewlete do senî dayîkan rê hesab bido?’ Ganî goş bidîyo vengê dayîkan. Ganî hepsîyê nêweşî cade bêrê verdayene.”
Tedayê vera çapemenî û muxalefetî
Ayşegul Dogane vera tesdîqkerdişê cezaya Hemşaredarê Colemêrgî Siddik Akişî cewab da û wina dewam kerd: “Nê rojanê peyênan de vera zaf kesan operasyonî benê. Vera partîyanê kurdan operasyonêk bî û sîyasetmedarê kurdî ameyî destbendkerdene. Sewbîna vera çapemenîye polîtîkayê sansur û qayûman dewam kenê; keyepelê ajansan hema zî yenê girewtene. No pêlê destbendkerdiş, tepîştiş û sansurî vernîya demokratîkbîyayîşê Tirkîya de asteng o. Tedayê vera ziwanê kurdkî zî hema dewam kenê.”
‘Ganî hetanî nika teqwîmêk dîyar bibîyêne’
Ayşegul Dogane derheqê beyanatê Serekê Meclîsî Numan Kurtulmuşî yê Komîsyonê Çimdarî de vat: “Hema zî bernameyêko dîyar çin o. Hema zî vano ‘demo tewr nêzdî de’. Ma tîya ra veng danê ke ganî nê ra pey teqwîmêk dîyar bibo. Kurtulmuş vano ganî no proses nêbo rantê tu partîyanê sîyasî; ma zî beşdarê nê vateyî benê. La ereynayîşê nê komîsyonî goreyê prosesî nîyo. Seba ma temsîlê partîyanê sîyasîyan ê nê komîsyonî zaf muhîm o.”
‘Hewce yo ke Yeni Partî qerarê xo ser o bifikirîyo’
Ayşegul Dogane qerarê Yeni Partî yê ca nêgirewtişê Komîsyonê Çimdarî yê Meclîsî de rexne kerd û vat: “Seba ke peynîya nê şerê 50 serreyî bêro, ganî herkes, bi taybetî muxalefet masa de bibo. Eke muxalefet mîyan de nêbo, mana ci a ya ke vateyêkê aye nê problemê girdî ser o çin o. Seba naye ganî Yeni Partî reyna qerarê xo ser o bifikirîyo.”
‘Ganî Heyet cade dest bi kar bikero’
Ayşegul Dogane persê rojnamegeran ser o derheqê Heyetê Aştî û Sîyasîbîyayîşî de ke Rayberê Şarê Kurdan Abdullah Ocalan do koordînatorîya ci bikero, ard ziwan ke hema dîyar nîyo çend endamî do tede ca bigîrê û vat: “Sîyasetmedar û waranê cîyayan ê komelî zî pawenê ke nê heyetî de ca bigîrê. Ganî no heyet zî cade dest bi kar û xebatan bikero.”









