Ankara – Parlamentera DEM Partî ya Şirnexî Newroz Uysal Aslane, derheqê îşkence û muameleyê xirabî de ke vera hepsîyanê cinîyan Emîne Çetîntaşe û Nevas Sakçake yeno kerdiş, Komîsyonê Cigêrayîşê Heqanê Merdiman ê Meclîsî (ÎHÎK) rê muracat kerd. Nê hepsîyî raştê cigêrayîşê rûtî û îşkenceyî ameyî. Newroz Uysal Aslane seba ke Wezîrê Edaletî Akin Gurlek cewab bido, pêşnîyazê persî zî da.
Parlamentera DEM Partî ya Şirnexî Newroz Uysal Aslane derheqê îşkence û muameleyê xirabî de ke vera hepsîyanê cinîyan Emîne Çetîntaşe û Nevas Sakçake yeno kerdiş, ÎHÎK rê muracat kerd. Nê hepsîyî Hepisxaneyê Osmanîye de tepişîyayî yê. Newroz Uysal Aslane seba ke Wezîrê Edaletî Akin Gurlek cewab bido, pêşnîyazê persî zî da.
Newroz Uysal Aslane dîyar kerd ke endamanê Komeleya Huquqnasan a Seba Azadîye (OHD) derheqê îşkence û muameleyê xirabî de hepisxane zîyaret kerd û hepsîyan reyde pêvînayîş kerd. Aye wina vat: “Pêvînayîşê avûkatan de Emîne Çetîntaşe dîyar kerda ke 6ê teşrîna peyêne ya 2026î de aye berda Xestexaneyê Dewlete yê Osmanîye. Badê tedawîye, wexto ke arda hepisxane, memuranê hepisxaneyî cigêrayîşo viran aye ser o ferz kerdo. Wexto ke a vera nê çîyî vejîyaya, aye berda cayêk ke kamera uca nêvînena; uca ameya kuyayîş û bi zor cigêrayîşo viran kerdo. Emîne Çetîntaşe vera nê çîyî vejîyaya û sloganî eştî. Sewbîna memuranê hepisxaneyî Emîne Çetîntaşe rê vato ke ê do nika ra pey cigêrayîşo viran înan ser o ferz bikerê.”
Newroz Uysal Aslane zîyaretê komîsyonî de waşt ke muameleyo xirab û îşkenceyê ke Hepisxaneyê Osmanîye de bena bêrê tehqîqkerdiş. Aye waşt ke memurê ke a roje wezîfedar bîyî û ferman dayo bêrê tesbîtkerdiş û raporê kuyayîşî zî bêro teftîşkerdiş. Sewbîna Newroz Uysal Aslane waşt ke muameleyê xirabî yê sey cigêrayîşo viran û cigêrayîşê fekî ser o tehqîqat bêro kerdiş û mewzuatê îşkence û muameleyê xirabî newe ra bêro ewnîyayîş û sererastkerdiş.
Sewbîna Newroz Uysal Aslane derheqê hepsîya cinî Nevas Sakçake de zî ÎHÎK rê muracat kerd. Nevas Sakçake eynî hepisxane de tepişîyayeya û raştê muameleyo xirab û îşkenceyî ameya. Muracatê xo de Newroz Uysal Aslane dîyar kerd ke Nevas Sakçake zî pêvînayîşê avûkatanê OHD’yî de da zanayîş ke çimê aye de problem est o la seba ke a zî sey Emîne Çetîntaşe raştê cigêrayîşê viranî nêro, nêşina xestexane. Newroz Uysal Aslane waşt ke îşkence û muameleyo xirab ê Hepisxaneyê Osmanîye bêrê cigêrayîş.
Sewbîna Newroz Uysal Aslane seba ke Wezîrê Edaletî Akin Gurlek cewab bido, pêşnîyazê persî da.








