Parlamentere Sebahat Erdogan Saritaşe Sêrt de panele de ke seba 25ê teşrîna peyêne ameye organîzekerdene, qisey kerd û vat ke cinî hêvî û azadîya xo bi felsefeya ‘Jin Jiyan Azadî’ ra girê danê.
Bi pêşengîya DEM Partî ya Sêrtî, çarçewaya 25ê Teşrîna Peyêne, Roja Mîyanneteweyî ya Têkoşînê Vera Şîdetê Ser Cinîyan de, derheqê cinîyanê tepîşteyan ê ke hepisxaneyan de esîr yenê vindarnayene, Salona Denîz Poyraz a awanîya DEM Partî de panelêk ame organîzekerdene. Aktîvîstê TJA’yî, endamê cinî yê sazgehanê komelkî û zaf welatîyan panele de ca girewt. Panele ra ver seba şehîdanê şorişî deqeyêk rêzegirewtiş ame kerdene. Panel hetê Îdarekara Şaxa ÎHD’yî ya Sêrtî Muhbet Altan Çetîne ra ame îdarekerdene.

‘Şerê înan o taybet nêşkeno ma bin bierzo’
Parlamentera DEM Partî ya Şirnexî Newroz Ûysal Arslane bale ante pratîkanê şerê taybetî ser o ke bi serran o vera cinîyan yeno ramitene û vat: “Destdergîye û kerdişê ke vera cinîyan benê, polîtîkayanê şerê taybetî ra yê. Pêroyê Kurdîstan û dinya de rojêk çin a ke cinî nêrê kiştene. Nê kerdişî ewro ra nîyê, serranê 1990an ra heta ewro dewam kenê. Dewlete şerê taybetî bi destê JÎTEM, polîs û leşkeran Kurdîstan de her roje ramitêne û nê kerdişî hema zî dewam kenê. Ganî ma sey cinîyan vera naye xo ver bidê. Şerê înan o taybet qet nêşkeno ma bin bierzo.”

‘Her warî de keda cinîye yena vindîkerdene’
Parlamentera DEM Partî ya Sêrtî Sebahat Erdogan Saritaşe zî ard ziwan ke cografyaya Kurdîstan û Rojhelatê Mîyanênî de bi hezaran serran o ke vera cinîyan şîdet yeno ramitene û vat: “Têkoşînê Sakîne Cansiz, Klara Zetkin û zaf têkoşeranê ma yê cinîyan ma payan ser o verdano. Her çiqas ke cinî aver şîyê, hende zî hêrişê dewlete vera cinîyan est ê. Zaf nimûneyê cinîyanê ciwanan est ê ke ameyê kiştene û dewlete uca de camêrdî pawena. Ma cehd kenê ke nê problemanê rê çare bivînê û vera zîhnîyetê pederşahî vindê. Ma eşkenê şorişê Rojavanî ra nimûneyan bigîrê; felsefeya ‘Jin Jiyan Azadî’ heme cinîyanê kurdan û dinya rê bîya qewetêka girde. Her warî de keda cinîye yena vindîkerdene. Cinî hêvî û azadîya xo bi felsefeya ‘Jin Jiyan Azadî’ ra girê danê.”
Pers û cewaban ra pey panel bi berzkerdişê sloganê “Jin Jiyan Azadî, azad bike Rêbertî” qedîya.



















