Endamê Komîsyonê Cigêrayîşê Heqanê Merdiman ê TBMMyî (ÎHÎK) wekîlê DEM Partî Serhat Eren, Onur Duşunmez û Berîtane Guneş Altin semedê tepişteya nêweşa kanserî Evîne Zapsû muracatê Komîsyonî kerd.
Komîsyonê Cigêrayîşê Heqanê Merdiman ê TBMMyî (ÎHÎK) bi nameyê parlamenteranê DEM Partî Serhat Eren (Amed), Onur Duşunmez (Colemêrg) û Berîtane Guneş Altîn (Mêrdîn) ke nêweşa kanserî ya û rewşa ci krîtîk a û Zîndanê Bûnyanyî yê Kayserî de yena tepiştene, muracatê Komîsyonî kerd.
Muracatî de ame vatene ke rewşa weşîye ya Evîne Zapsû krîtîk a û nêeşkena îhtîyacanê xo yê bingeyînan bîyara ca. Reyna ame îfadekerdene ke rixmê cidîyetê rewşa ey zî tena lingan de tedawî ame kerdene û dima bê ke tedawîya hewceyî bêro kerdene peyser ame şawitene zîndanî. Parlamenteran waştişnameyê xo de Komîsyonê Cigêrayîşê Heqanê Merdiman (ÎHÎK) ra waşt ke rewşa Evîne Zapsû cigêro.
Muracatî de ame waştene ke derheqê nê babetan de cigêrayîşêk bêro kerdene:
* Ganî rewşa weşîye ya krîtîke ya Evîne Zapsû bêra vînayene û no muracat bêro cigêrayene.
* Şertê tehlukeyinî yê ke rewşa weşîye afernena ganî bêrê dîyarkerdene û cezaya Evîne Zapsû bêra taloqkerdene û a bi xo bêra veradayene.
* Rixmo ke tebaxa 2026î de şikê kanserî vejîyayo werte ganî tehqîqatêk bêro kerdene ke prosesê teşxîsî çira derg bîyo. Sewbîna ganî bêro cigêrayene ke 3ê teşrîna peyêne ya 2026î de dima ke rewşa ey giran bîye û wedarîyaye weçînayîşê giranî hema ke tedawîya ey temam nêbîya, çira reyna erşawîya hepisxane. Derheqê berpirsîyaran de tehqîqatêk ameyo destpêkerdene yan nê, ganî Wezaretê Edaletî û Mudirîya Zîndanê Kayserî rê persî bêrê kerdene; eke tehqîqatêk nêameyo destpêkerdene, ganî cade bêro destpêkerdene.








