Meclîsê Şarî yê Şingalî şehîdê 74 fermanan û heme şehîdê azadîye yad kerdî û bale ante ser o ke seba caardişê îrade û nasnameyêkê azadî do têkoşînê xo heta peynî dewam bikerê.
Meclîsê Şarî yê Şingalî bi wesîleyê serrgêra 11. ya xelisnayîşê Şingalî yê çeteyanê DAÎŞî ra eşkerayîyêka nuştekî daye. Eşkerayîya Meclîsê Şarî yê Şingalî wina ya:
“Badê xoverdayîşê gird û bêemsalî ke hetê gerîlayanê azadîya Kurdîstanî û şerwananê êzîdîyan ra ame kerdene, herra Şingalî ya pîroze 13ê teşrîna peyêne 2015î de ameye azadkerdene. Azadî bi pêşengîya fermandaranê nemiran Şehîd Dilşêr Herekol, Egîd Civiyan, Berfîn Nûrhaq, Nûjîn Amed, Çeko Çatak, Saît Hesen, Berxwedan Tolhildan, Dijwar Feqîr û Zerdeşt Şengalî bîye qetî. Tarîxê şarê ma senî ke bi hêriş û fermanan pir o, egîdanê nê şarî zî bi xoverdayîşê xo her wext destanê serkewtişî nuştê.
Kede û têkoşîno ke seba azadkerdişê Şingalî ame dayene vernîya qerardarîye akerde û temîn kerd ke wayîrê şûurê komelkîbîyayîşî bivejîyê. Bi awankerdişê cuyêka azade tarîxê komelê êzîdîyan de rîpelêko newe abîyo. Bi viraştişê dezgehanê komelkî û demokratîkan şarê ma resayo merheleyêk ke dewleta Iraqî zî şêna nêzdîyê komelê ma bi eyinî biba û seba entegrasyonê demokratîkî gamanê muhîman bierza. No averşîyayîş û na asta ke ewro ma resayê ci, bi kede û cehdê Rayber Apoyî virazîyaya. Felsefeyê Rayber Apoyî bîyo paştîya bingeyine ya xorêxistinkerdiş, averşîyayîş û newe ra awankerdişî. Gamê ke ewro dewleta Iraqî seba entegrasyonê demokratîkî erzena zî “Prosesê Haştî û Komelê Demokratîkî” reyde têkilîdar ê ke Rayber Apoyî da destpêkerdene.
Şingal bi keda domananê xo ameyo azadkerdene û ewro bi entegrasyonê demokratîkî qewetê pawitişê komelê xo girewto xo dest. Ewro ciwanê êzîdîyan ê cinî û camêrdî senî ke sey pawitoxê komelî wezîfe û berpirsîyarîya xo anê ca ke reyna qet rayîr nêdê fermanan, komelo demokratîk zî bi amancê resayîşê îradeyê xo yê sîyasî wayîrê vindertiş û qewetêkê qerardarî yo. Amanc û têkoşînê ma seba şinasnayîşê îradeyê komelê êzîdîyan û Şingalî yo. Ma sey komelê êzîdîyan û pêardoxê Şingalî 12 serrî yo bi qerardarîyêka girde komelkîbîyayîşê xo awan kerd û bi îradeyê komelê azadî xebatê xo ramitî. Şinasnayîşê îradeyê sîyasî yê komelî do dewleta Iraqî hîna xurt bikero û yewîya zereyê welatî hîna qayîm bikero.
Bi na bawerî ma venga heme şarê xo, nêzdî û dostanê xo danê ke na roja tarîxî her ca de bi şayîya roşanî pîroz bikerê. Sewbîna ma heme şarê xo yê Şingalî dawet kenê ke 13ê teşrîna peyêne saete 14.00 de verê Medreseya Sor de ke merkezê Şingalî de ya, beşdarê şahîya pîrozkerdişê serrgêra 11. ya azadkerdişê Şingalî bibê.”
