TJA Mardîn de bi eşkerayîyêk startê çalakîyanê 25ê Teşrîna Peyêne da û wina vat: “Ma bawer kenê ke ciwanî hêzê vurîyayîşî, cinî hêzê awankerdişî û komel zî hêzê azadîye yê. Coka ganî ma vera nê polîtîkayanê xirabkerdişan bêveng nêmanê.”
Têgêrayîşê Cinîyanê Azadan (TJA) Mardîn de startê çalakîyanê 25ê Teşrîna Peyêne, Roja Mîyanneteweyî ya Têkoşînê Vera Şîdetê Cinîyan Ser o da. Cinî Taxa Ataturkî ya qezaya Qoserî ya Mardînî de ameyî têhet. Uca belavokê ke derheqê têkoşînê vera hişbiran de ameybî hedrekerdene, ameyî vilakerdene. Sazgeh û dezgehê sîvîlî û temsîlkarê partîyanê sîyasîyan çalakîye de ca girewt. Bi nameyê cinîyan aktîvîsta TJA’yî Medîne Aksu metnê eşkerayîye wend.
Eşkerayîye de wina ame vatene:
“Ma ewro sey Têgêrayîşê Cinîyanê Azadan (TJA) qezaya Qoserî ya Mardînî de destpêk û startê çalakîyanê 25ê Teşrîna Peyêne, Roja Mîyanneteweyî ya Têkoşînê Vera Şîdetê Cinîyan Ser o danê.
Ma na roje bi vîrardişê wayanê Mîrabelî û heme cinîyanê ke hetê sîstemê camêrdserdestî ra ameyê qetilkerdene, û bi qerardarîya xo ya vera her tewir şîdetî pêşwazî kenê. Ma zanê ke peyê zaf kiştişanê cinîyan de şîdetê camêrdserdestî, zîhnîyetê serdestî û mekanîzmayê ke kiştoxan bêceza verdanê, est ê. Şîdetê ser cinîyan problemêko şexsî nîyo, problemêko sîstematîk û polîtîk o.
Welatê ma de sîstemo serdest ê kapîtalîst bi metodanê xo yê cîyayan ciwanan û cinîyan erzeno mîyanê torrêka teberê exlaqî û komelî. Bêhêvîtî, hişbirî, tiryakîye û cuya teberê merdimîye bi hacetanê şerê taybetî aver beno. No tena problemêko şexsî nîyo, problemêko komelkî û sîyasî yo ke ameyoxê komelê ma xeneqneno tehlukeyî.
Ma bawer kenê ke ciwanî hêzê vurîyayîşî, cinî hêzê awankerdişî û komel zî hêzê azadîye yo. Coka ganî ma vera nê polîtîkayanê xirabkeran bêveng nêmanê.
Ma do bi hişyarkerdiş, perwerde, kultur, huner, ziwan û rêxistinekerdişê komelî vera hişbir, tiryakîye û heme hacetanê şerê taybetî têkoşînê xo gird bikerê.
Ma do ciwanan torra hişbiran ra, cinîyan zext ra û komelê xo xirabbîyayîş ra bipawê.
Têkoşînê ma seba komelêkê azad, hişyar, weş û wayîrê erjanê xo do bêvindertiş dewam bikero.
Bi têkoşînê ma do cinî rêxistinbîyaye û azad bibê, ciwanî do wayîrê hêzî bibê û komel do azad bibo!
Bi hêzê cewherî û îradeyê azadî, nika demê cinîyan o.
Jin jiyan azadî!”
Badê eşkerayîye reyna bi sloganan belavokî taxe de ameyî vilakerdene.
