Goreyê doneyanê zaf şîrketanê cigêrayîşî rayê AKPyî aşma êlule de %36 bîyî, aşmanê teşrîna verêne û peyêne de 3 pûanî kewtî û bîyî %33. Sewbîna bawerîya komelî ya bi îqtîdar û bicaardişê edaletî zî zaf qels bîya.
Tirkîya de averşîyayîşê fînansî yê ke sey “krîz û dizdîya fonî” kewtî rojdem, bîyî rojdemo sereke. Goreyê doneyan bi rayîrê fonanê peredayîşî heta 2,7 trîlyon lîrayî dizdî û dizdîye ameya kerdene û yeno texmînkerdene ke mesrefê pêroyî yê na krîze 100 mîlyar dolarî ra zêdeyêr o. Krîze bitaybetî badê hişyarî û mudaxeleyanê dormeyanê fînansî yê mîyanneteweyîyan bi temamî teqaye û badê ke têkilîya aye ya îdarekaranê AKPyî reyde vejîyaye meydan, hîna zêde kewte rojdemê Tirkîya. Badê nê averşîyayîşan AKPyî pêşnîyazêkê qanûnî pêşkêşê Meclîsî kerd la partîyê muxalefetî vera ci vejîyayî û vat: “Îqtîdar wazeno bi nê pêşnîyazî serê na dizdîye bigîro. Ganî her kes ke destê ci na xapênayîşî de est o, bêro hukmkerdene û hesab bido.”
Şîrketê cigêrayîşî yê sey ASAL, AREA, Areda Survey, ADA Araştirma, BETİMAR û Ank-Arî derheqê krîzê fonî de anketî kerdî. Goreyê netîceyan: %45,6ê şarî dezgehanê kontrolî berpirsîyar vîneno (ASAL); %59,4ê şarî qet bawer nêkeno ke berpirsîyaran ra hesab bêro persayene (AREA); %42 rasterast îdareyê ekonomî sûcdar keno (Areda Survey); %32,7 dezgehanê fermîyan ê çimdarîye berpirsîyar vîneno (ADA Araştirma); %50,5 bawer keno ke no tehqîqat do bawerîya bi îqtîdarî kêmî bikero (BETİMAR); %31,9 hukmat û îdareyê ekonomî berpirsîyar vîneno (Ank-Ar).
Serekê şîrketa GENARî Îhsan Aktaşî ke bi nêzdîyîya xo ya îqtîdarî yeno zanayene, resna ke goreyê cigêrayîşê înan ê 2-3ê teşrîna peyêne 2026î rayê AKPyî nêzdîyê 3 pûanan kêmî bîyî. Goreyê anketê GENARî AKP êlule de %36,1 bî, teşrîna verêne de kewto %33,7 (-2,4); CHP %6,6 ra vejîyayo %7,5 (+0,9); MHP %8,0 ra kewto %7,2 (-0,8); DEM Partî %9,4 ra resayo %9,5 (+0,1).
Goreyê cigêrayîşan dizdîya fonan bawerîya bi dezgehanê dewlete û sîstemê fînansî bi temamî kena binê tehqîqatî. Çar babetê serekeyî vejîyenê meydan: raya pêroyî tena îdarekaranê fonan ney, dezgehanê çimdarîye û îdareyê ekonomî zî gumanbar vînena; komel wazeno ke destserronayîşê perê neheqî bêro kerdene la kes nêwazeno ke no zerar budceyê pêroyî yê şarî ra bêro dayene; hêvîya komelî ya netîcegirewtişê tehqîqatan û resayîşê heqê mexdûranê fonan zaf qels a; rayanê AKPyî de kêmbîyayîşêko zêde est o.
