Wezîra verêne û Hetkara Serekê Pêroyî ya verêne ya AKPyî Fatma Betul Sayan Kaya çarçewaya tehqîqatê dizdîya fonî de ameye tepiştene. Mêrdeyê aye Îlyas Kaya û Sereko verên ê SPKyî Îbrahîm Omer Gonul zî bi şertanê kontrolê edlî ameyî verdayene.
Demêko derg o ke krîz û dizdîya fon û ekonomî rojdemo sereke yo. Serdozgerîya Komare ya Îstanbulî derheqê dizdîya fonî de tehqîqat dabî destpêkerdene û no tehqîqat dewam keno. Serkêşê na dizdîye zî wezîra verêne ya AKPyî Fatma Betul Sayan Kaya û mêrdeyê aye Îlyas Kaya yê. Fatma Betul Sayan Kaya û mêrdeyê aye vizêr pîya şîyî Dadgeha Çaglayanî ya Îstanbulî û îfade da. Sewbîna Sereko verên ê Heyetê Pîyasaya Sermîyanî (SPK) Îbrahîm Omer Gonulî zî çarçewaya tehqîqatî de Dadgeha Îstanbulî de îfade da.
Badê ke îfadeyê nê serkêşanê dizdîye ameyî girewtene, Îlyas Kaya û Îbrahîm Omer Gonul bi şertanê kontrolê edlî yê îmzaeştiş û qedexeyê vejîyayîşê teberê welatî hetê dadgerîya nobetdare ra ameyî verdayene.
Wezîra verêne û Hetkara Serekê Pêroyî ya verêne ya AKPyî Fatma Betul Sayan Kaya badê ke Dadgerîya Cezayê Sulhî ya Nobetdare de îfade da, bi sûcanê sey “muxalefetê vera Qanûnê Pîyasaya Sermîyanî” û “endamîya rêxistina ke bi amancê sûckerdişî ameya ronayene” ameye tepiştene û dadgerî a şawite hepisxane.
