Edene – Dayîkê Aştîye ke seba Rayberê Şarê Kurdan Abdullah Ocalanî şaristananê Amed, Wan, Riha, Sêrt û Êlihî ra kewtî rayîrê Ankara, vat: “Dayîkê Aştîye wazenê Rayberîye bivînê.”
Dayîkê Aştîye şaristananê Vakurê Kurdîstanî ra ameyî Amed û Wan. Uca ra seba azadîya Rayberê Şarê Kurdan Abdullah Ocalanî û seba Prosesê Aştîye û Komelê Demokratîkî kewtî rayîrê Ankara û resayî cayê xo. Dayîkê ke şaristananê Amed, Wan, Riha, Êlih û Sêrtî ra ameyî têhet, ajansê ma rê qisey kerd. Dayîkan vat ke 5 şaristanan ra pîya kewtî rayîr û seba kurdan û Rayberê Kurdan statu wazenê.
‘Bes o, dayîkî gonî nêwazenê, aştî wazenê’
Dayîka Aştîye ya Rihayî Adalet Çaye vat ke ê şaristananê xo ra ver bi meclîsê Ankara ameyî û wina dewam kerd: “Qerarê şerî meclîs ra vejîyeno, coka qerarê aştîye zî meclîs ra vejîyeno. Ma dayîkî pê lingan ameyî Ankara. Ma venga dayîkanê ke dej ancito danê; ma ewro nêwazenê ke yew dayîk zî bibermo. Dejê dayîkan pêro yew o, ferqê ci çin o.”
Adalet Çaye bale ante gamanê Têgêrayîşê Azadîye ser o û vat: “Kurdan ewro hende gamî eştî la dewlete hema zî gamêka şênbere nêeşta. Hepisxaneyan de cezaya hepsîyan qedîyaya la înan nêverdanê. Gamê ke kurdan ewro eştî, dewlete nêeştî. Dewlete çi pawena, wazena hîna hende gonî birijîyo? Bes o, dayîkî gonî nêwazenê, aştî wazenê. Derdêko ke kurdan nêancito nêmendo; gonîya ma sey awe rijîyaya. Ma aştî wazenê.”
‘Proses Rayberîye ser o aver şino’
Adalet Çaye wina dewam kerd: “Serekê ma seba aştîye destê xo derg kerdo, ganî hewa de nêmano. Ewro no proses Rayberîye ser o aver şino. Coka heta ke Rayberîye nêro mîyanê ma aştî nêvirazîyena. Ganî çapemenî û dayîkî şêrê verê Serekî. Ma wazenê Rayberîye bivînê.”
Dayîka Aştîye ya Êlihî Afîye Savaşe vat ke prosesê aştîye xetimîyayo û wina dewam kerd: “Helbet ma zî nêvanê ke wa problemê se serran cade çareser bibo, la wa gaman bierzê. Serekî 3 rey game eşta. Meclîs de komîsyonêk ame awankerdene la komîsyon zaf hêdî aver şino. Ma venga dewlete û komîsyonê meclîsî danê: Destê ke Rayberîye derg kerdo, destêkê edaletî yo. Coka wa ê zî destê Rayberîye hewa de meverdê. Hema zî hepsîyanê ma ra vanê ‘vajê ma poşman ê’. La kurdan çîyêk nêkerdo ke pê poşman bibê. Ma kurdî wazenê ke awe û herra ma azad bibo. Wa seba gerîlayan zî qanûnêk vejê, wa bêrê sîyaset de ca bigîrê.”
‘Ma wazenê hepsîyê ma bêrê verdayene’
Dayîka Aştîye ya Wanî Keser Fîdane vat ke 71 serre ya û 45 serrî yo têkoşîn dana û wina dewam kerd: “Ma wazenê hepsîyê ma bêrê verdayene. Wa gerîla û leşkerî nêmirê; ma aştî û azadî wazenê. Ma vanê êyê ke şîyî xora şîyî, wa êyê ke mendî ser o çîyêk nêro. Ma pê nê hende dejan zî hona vanê aştî.”
Dayîka Aştîye ya Amedî Hanîfa Akbulute vat ke azadîya şarê kurdan û azadîya Rayberê înan yewbînan ra girêdaye yê û wina dewam kerd: “Ma wazenê berê hepisxaneyan bêrê akerdene. Hepisxaneyan de hepsîyê nêweşî est ê. Ez venga heme dayîkan dana; wa bêrê, ma destê yewbînan bigîrê û aştîye bîyarê.”
Dayîka Aştîye ya Sêrtî Wedha Kaçare zî vat ke ê nêwazenê kes bimiro û wina dewam kerd: “Heta ke serekê ma nêro mîyanê ma aştî nêbena. Eke aştî nêbo sey kurdan tirkî zî zerar vînenê. Coka ganî aştî bibo.”
