Endamê Meclîsanê Dayîkanê Aştîye yê Amed, Êlih, Sêrt, Wan, Tetwan û Colemêrgî bi sloganê “Biciwîyo Serek Apo” kewtî rayîr şonê Ankara. Dayîkî seba azadîya fîzîkî ya Rayberê Şarê Kurdî Abdullah Ocalanî û averşîyayîşê Prosesê Aştîye û Komelê Demokratîkî şonê.
Dayîkî bi sloganê “Biciwîyo Serek Apo” Amed, Sêrt û Êlihî ra kewtî rayîr şonê Ankara. Ê seba rayîraşîyayîşê Prosesê Aştî û Komelê Demokratîkî, azadîya fîzîkî ya Rayberê Şarê Kurdî Abdullah Ocalanî, rewşa girewteyanê nêweşan û binpaykerdişê heqanê girewteyan şonê.
ÊLIH
Verê ke dayîkî rayîr kewê, verê binaya DEM Partî ya Êlihî de eşkerayîyêk dayî. Endama Meclîsê Dayîkanê Aştîye yê Êlihî Kamîle Şîmşeke bi nameyê Dayîkanê Aştîye yê Êlih û Sêrtî qisey kerd. Aye wina va: “Ma Dayîkê Aştîye yê û ma aştîye wazenê. Eke dayîkê leşkeran û polîsan zî bêrê kişta ma, ma do pîya şêrê Ankara. Ma seba aştîye şonê ke aştîyêka daîmîye virazîyo. Ma na aştîye seba Serekê xo û heme girewteyanê ke hepisxaneyan de esîr yenê tepiştiş wazenê. Wexto ke Serek bêro veradayîş, heme dinya do weş bibo û aştîyêka weşe do bêro her çar parçeyanê Kurdîstanî. Kesê ke 30 serran ra zafêr o hepisxaneyan de manenê, înfazê zaf kesan ameyê veşnayîş û nêyenê veradayîş. Ma wazenê ke heme girewteyê nêweşî bêrê veradayîş. Ma seba nê kerdişan şonê Ankara. Ganî êdî dewleta tirkan zî gamanê şênberan bierza. Di serrî yo ke hema gamêk nêeşta. Her rey ke Serekî reyde pêvînayîş bibo, o vano: ‘Ez aştîye wazena.’ Hetanî nika tu aştîye nêameya Tirkîya. Ma hêvî kenê ke emser bibo serra aştî û azadîye û na gonîye nêrijîyo.”
Dayîkê Aştîye bi sloganê “Bê Serek cuye nêbena” kewtî rayîr.
AMED
Meclîsê Dayîkanê Aştîye yê Amedî seba prosesê aştîye, rewşa girewteyanê nêweşan, binpaykerdişê heqanê girewteyan û dergkerdişê înfazê girewteyan Parka Koşûyolû ya qezaya Rezanî ya Amedî de ameyî têhet û kewtî rayîrê Ankara.
Verê ke dayîkî hetê Ankara ser rayîr kewê, uca bi nameyê Dayîkanê Aştîye yê Amedî Afîfe Karte qisey kerd. Afîfe Karte bale ante şîyayîşê înan ê Ankara ser û wina va: “Ma seba azadîya Serekê xo, seba rewşa girewteyanê nêweşan, binpaykerdişê heqanê girewteyan û dergkerdişê înfazê girewteyan şonê. Ma nêwazenê ke êdî dayîkî bibermê. Wa aştîyêka daîmîye virazîyo. Ma do Ankara de berê hepisxaneyan akerê.”
Badê qiseykerdişî Dayîkê Aştîye bi sloganê “Biciwîyo xoverdayîşê dayîkan” ameyî oxirkerdiş.
WAN, COLEMÊRG Û TETWAN
Endamê Meclîsê Dayîkanê Aştîye yê Wan, Colemêrg û Tetwanî çarçewaya Prosesê Aştîye û Komelê Demokratîkî de kewtî rayîrê Ankara. Ê şonê ke waştişanê xo biyarê ziwan û gamê şênberî bêrê eştiş. Dayîkan dîyar kerd ke amancê înan o sereke qezenckerdişê azadîya fîzîkî û statuyê Rayberê Şarê Kurdî Abdullah Ocalanî û azadkerdişê girewteyanê sîyasîyan o.
Dayîkê Aştîye Wan de Parka Musa Anterî de ameyî têhet. Înan da zanayîş ke ê do çarçewaya programê xo yê hîrê rojan de Ankara de partîyanê sîyasîyan reyde pêvînayîşan bikerê û eynî wextî de “Nobeta Aştîye” dest pêbikerê. Ame zanayîş ke Dayîkê Aştîye do badê caardişê çalakî û programê xo yo hîra 3yê teşrîna peyêne de çalakîya xo biqedênê.
Wexto ke dayîkî parka ke seba rayîrkewtişî ameybî dîyarkerdiş de ameyî têhet, bi coşêko gird sloganê xo eştî. Çalakîye de bêvindertiş sloganê “Biciwîyo xoverdayîşê hepisxaneyan” û “Jin, Jiyan, Azadî; Rayberîye azad bike” ameyî eştiş.
PROGRAMÊ ANKARA
Programê Meclîsê Dayîkanê Aştîye yê Ankara wina yo:
Dayîkê Aştîye do meşte saete 12.00 de Parka Meclîsî de eşkerayîyêk bidê. Badê eşkerayîye dayîkî do şêrê Parka Kurtuluşî û uca Nobeta Aştîye dest pêbikerê. Roja dîyine ya nobete de zî Dayîkê Aştîye do Meclîs de tewrê kombîyayîşanê partîyanê sîyasîyan bibê û heyetêkê dayîkan do partîyanê sîyasîyan ziyaret bikero. Badê Meclîsî dayîkî do Wezaretê Edaletî reyde pêvînayîşêk bikerê.
