Ankara – Hemserekeya Pêroyî ya HDP’yî ya verêne Fîgen Yuksekdage Hepisxaneya Kandira ra konferansê cinîyan ê “Ma pîya qalê ameyoxî kenê” rê mesajêk erşawit. Fîgen Yuksekdage wina va: “Hetkarîya cinîyan eşkena bibo pirdêk ke heme dînamîkanê komelkîyan û sîyasîyan biresno yewbînan û yew bikero.”
Hemserekeya Pêroyî ya Partîya Demokratîke ya Şaran (HDP) ya verêne Fîgen Yuksekdage 11 serran ra zafêr o ke Hepisxaneya Kandira de yena tepiştiş. Aye konferansê cinîyan ê “Ma pîya derheqê ameyoxî de qisey kenê” rê mesajêk erşawit.
Fîgen Yuksekdage mesajê xo de bale ante muhîmîya yewbîyayîşê cinîyan ser û nê çîyî vatî: “Cinîyê qîymetinî, ez pol bi pol vindertişê şima û înîsîyatîfê şima yo ke hêz û vateyê ameyoxî mûneno, silam kena.
Awankerdişê cuyêka ke tede seba cinîyan û heme komelî aştîye, azadî, edalet û heqê demokratîkî esas bê, ewro her roje ra hîna muhîm o. Ma cografayêka sîyasîye de yê ke çar hetê ma de şer û pêla şîdetî est a. Atmosferê sîyasî yê zereyî yê Tirkîya zî cinîyan û şaranê ma rê firsendê nefesgirewtişî nêdano.
Têgêrayîşê cinîye bin nê şertanê giranan de wayîrê hêz, feraset û tecrubeyêkê winasî yo ke eşkeno heme bindest û mezlûman seba mucadeleyê aştî û komelê demokratîkî bido weriştiş. Hetkarîya cinîyan eşkena bibo pirdêk ke heme dînamîkanê komelkîyan û sîyasîyan zî yew bikero û biresno yewbînan. Vera nîzamê zulm, neseyyewbînî û bêedaletîya komelkîye ke şîdetê serdestîya camêrdan û zextanê cinsîyetê komelkî ra hakim beno, hiş, îrade, piştîdayîş û mucadeleyê cinîye eşkeno zaf çîyan bivurno.
Bi na hêvî û bawerîye ez heme cinîyanê ke keda înan nê konferansî de esta, bi heskerdiş û rêz silam kena û înan rê serkewtiş wazena.”
