Amed – DFG, MKG, Dîsk-Basin-Îş û zaf rojnamegeran serra 8. ya wefatê Kadrî Kayayî de mamoste û rojnameger Kadrî Kaya mezelê ey ser o vîr ard.
Rojnameger û kedkarê Çapemenîya Azade Kadrî Kaya Goristanê Yenîkoyî yê qezaya Rezanî ya Amedî de, mezelê xo ser bi girseyî ame vîrardiş. Endam û îdarekarê Komeleya Rojnamegeranê Dîcle Firatî (DFG), Komeleya Rojnamegeranê Cinîyan a Mezopotamyayî (MKG) û Dîsk-Basin-Îş tewrê vîrardişî bîyî. Zaf rojnamegerî û merdimê Kadrî Kayayî zî uca bîyî. Vîrardiş seba heme şehîdanê Çapemenîya Azade bi deqîqeyêka rêzgirewtişî dest pêkerd.
Hemserekê DFG’yî Selman Çîçekî badê rêzgirewtişî qisey kerd. Selman Çîçekî dîyar kerd ke ê tu rey mamoste Kadrî Kaya xo vîr ra nêkenê û do her tim rayîrê ey ser o şêrê.
Rojnameger Mehmet Alî Ertaşî zî îfade kerd ke mamoste Kadrî Kayayî xebatanê Çapemenîya Azade rê kedêka pîle daye. Mehmet Alî Ertaşî wina va: “Mamoste Kadrî serranê 1990î ra heta peynîya emrê xo kedêka pîle daye. Ey hem hetê gureyî ra hem zî hetê rojnamegerîye ra mamostayîya ma kerde. Ey ma rê rayîrêko roşn akerd û ma zî do her tim no rayîr ser o şêrê. Ma şexsê mamoste Kadrî de heme şehîdanê Çapemenîya Azade reyna xo vîr anê.”
Vîrardiş bi ronayîşê gulan qedîya. Gulî mezelê mamosteyê Çapemenîya Azade Kadrî Kayayî ser ameyî ronayîş.
