Amed – Çalakîyê dewijanê dewa Arzoxlî yê vera projeyê GES’î roja 8. de dewam kenê. Dewijanê ke vera GES’î çalakî kenê, wina vat: “Hetanî ke no talan nêvindero, ma do mucadeleyê xo dewam bikerê.”
Dewa Arzoxlî girêdayeyê qezaya Sûrî ya Amedî ya. Dewe de cehdê awankerdişê projeyê GES’î dewam keno. Çalakîyê dewijan ê vera no proje zî roja 8. de dewam kenê. Şirketa ke wazena projeyê GES’î erdanê dewe ser o awan bikero, rojan ra nat leşkeran reyde yena cayê projeyî. Dewijî vera naye mucadele kenê.
Dewijan uca venga mesulan da û waşt ke ê xebata ke yena kerdiş bivindarnê. Dewijan reyna dîyar kerd ke hetanî ke talan nêvindero, ê do mucadeleyê xo dewam bikerê.
Hemserekeya DBP ya Amedî Ruçem Elyakut zî bi nameyê sazgehanê demokratîkan qisey kerd. Ruçem Elyakute bale ante polîtîkayanê dewlete yê vera xoza ser û wina va: “Ma vera nê polîtîkayanê dewlete şarê xo het de yê. Hetanî ke talanê înan biqedîyo, ma do şarê xo reyde pîya mucadele bikerê.”
