Wan – 23yê teşrîna verêna 2011 de Wan de erdlerzêko giran bi girsîya 7,2 bî; erdlerz de 644 hemwelatijî ganê xo ra bîyî û nêzdîyê 2 hezar kesî birîndar bîyî. Ser nê erdlerzê giranî ra 15 serrî vîyartî.
Erdlerzo giran ke 23yê teşrîna verêna 2011 de Wan de bî, merkezê ey dewa Sosratî ya qezaya Tûşba ya Wanî bî. Girsîya erdlerzî 7,2 bî û taybetî qezaya Erdîşî de felaketêko gird viraşte. Erdlerzê 23yê teşrîna verêne û erdlerzanê qijan ê badê ey de bi pêroyî 644 hemwelatijî ganê xo ra bîyî. Nêzdîyê 2 hezar kesî birîndar bîyî û bi seyan kesî zî binê enqazî ra bi ganî ameyî xelasnayîş. Heme bajarî de nêzdîyê 140 hezar awanîyan zerar dî; înan ra 40 hezar awanî sey awanîyê giran zerardîyayeyî yan zî bi temamî rijîyayeyî ameyî qeydkerdiş.
‘Erdlerzê 9ê teşrîna peyêne’
Wexto ke cehd yeno kerdiş ke birînê erdlerzê verênî bêrê pêçayîş, şewa 9ê teşrîna peyêne de erdlerzêko bîn bi girsîya 5,6 bî ke merkezê ey Artemêt bî. Nê erdlerzî de 25 awanî rijîyayî ke erdlerzê verênî de zerar dîbî; Otelê Bayramî zî înan ra yewe bî. Nê hedîseyî de zî 41 kesî ganê xo ra bîyî.
Goreyê melumatanê AFAD’î, enerjîya ke erdlerzê bingeyênî yê 23yê teşrîna verêne de vejîyaye meydan, bombeya atomî ya ke Hîroşîma ser eşte ra 33,2 qatî xurtêr bîye. Aşmanê badê erdlerzî de herême de 11 hezarî ra zêdeyêr erdlerzê qijî zî ameyî qeydkerdiş.
