Şaredariya Îdirê ji bo sepandina Qanûna Îmarê ku welatî ev bi salan e têne mexdûrkirin, li 3 taxan civînek agahdariyê li dar xist û beşek tapûyên welatiyan jî belav kir.
Ji aliyê Şaredariya Îdirê ve têkildarî pêvajoya belavkirina tapûyên ku di encama Sepandina Xala 18emîn a Qanûna Îmarê ya Xala 2yemîn de bo taxên Ozgur, Konakli û Karaagaçê yên navenda Îdirê hatine amadekirin, civîna agahdarkirina gel hat lidarxistin. Hevşaredarê Îdirê Mehmet Nurî Guneş, hevserokên Îdirê DEM Partiyê Raşîde Temîz û Kenan Kaya, endamên meclisa şaredariyê û şêniyên taxan beşdarî civînê bûn.
Hevşaredar Mehmet Nûrî Guneş ku di civînê de axivî, da zanîn ku ev 78 sal in gelê Îdirê ji hemû tiştan bêpar hatine hiştin. Mehmet Nûrî Guneş diyar kir ku wan ji bo hesapdayînê ev civîn li dar xistine û wiha got: “Me konek vedaye ku hûn bikaribin pirsgirêkên xwe yên derbarê tapûyan de bînin ziman û em jî li gor wê bikaribin tişta dikeve li ser milên me, em pêk bînin. Em dê îro bi temsîlî tapûyên we yên bi xwe ne û şaredarî yan jî saziyeke din şîrik nîn in, bidin we. Em dê ji bo hemû pirsgirêkên welatiyên xwe bi biryardar bixebitin.”
Di civînê de, derbarê sepandina îmarê û pêvajoya belavkirina tapûyan de agahdarî hatin dayîn; her wiha pirsgirêk, daxwaz û pêşniyarên şêniyên taxan hatin guhdarîkirin û ji bo çareseriyê nirxandin hatin kirin.
Di çarçoveya civînê de, tapûyên beşek ji welatiyên xwedî maf hatin radestkirin.
