Amed – Komîteya Amadekarî ya Festîvala Belgefîlmanê Amedî ya 10îne dîyar kerd ke sebebê problemanê teknîkî û ekonomîkî ra festîval serra 2027î rê taloq kerd.
Komeleya Sînemayî ya Rojhelatê Mîyanênî û Şaredarîya Peyasî do bi sloganê “Ma îta yê! Nobedarê dara goze yê” Festîvala Belgefîlmanê Amedî ya 10îne organîze bikerdêne. Komîteya Amadekarî ya festîvale hesabê xo yê medyaya dîjîtalî ser o ard ziwan ke festîval serra 2027î rê taloq kerd.
Eşkerayîya komîteyê ya derheqê taloqkerdişî de na ya: “Ma sey Festîvala Belgefîlmanê FîlmAmedî, bi serran sînemaya xoser, vîrê şaran û vatişê azadî yewca kenê. Ma qerar da ke Festîvala FîlmAmedî, ke ma do na serre 10îne organîze bikerdêne, taloqê serra 2027î kerde; sebeb kêmanîyê teknîkî û ekonomîkî yê ke ma prosesê amadekarî de rûbirû bîyî. Ma bi hêvîyê ke serra 2027î de festîvalê xo de reyna têhet bêrê, pêroyê sînemagerî, kedkarê sînemayî, sazîyî, dildaran û temaşekaran rê, ke heta ewro bi keda xo, bi fîlmanê xo, bi vatişanê xo û bi piştîpêdayîşî FîlmAmed gird kerd, keyeawanîye wazenê.”
