Rêxistina DEM Partî ya Îstanbulî derheqê kongreyê xo de ke do 20ê kanûne de bêro kerdene, beyanat da. Beyanatî de ame dîyarkerdene ke aştî û komelo demokratîk do ser bikewo û wina ame vatene: “Ma seba Aştî û Komelo Demokratîk xo rêxistin kenê.”
Rêxistina DEM Partî ya Îstanbulî do 20ê kanûne de kongreyê xo bikero. Beyanat awanîya DEM Partî de ame dayene; pankarta “Ma seba Aştî û Komelo Demokratîk xo rêxistin kenê” ameye akerdene. Beyanato kirdaskî hetê endamê Komîsyonê Kongreyî Ferdî Yamanî ra û beyanato tirkî zî hetê Hemverfeka Komîsyonê Kongreyî Aylîn Hacaloglûye ra ame wendene.
‘Amanc o yo ke şar bi krîzanê ekonomîk, komelkî û sîyasîyan bêboy bêro verdayene’
Yamanî vat ke ê rojanê tarîxîyan ê krîtîkan ra vîyarenê: “Hem Tirkîya de hem zî metropolan de amanc o yo ke şar bi krîzanê ekonomîk, komelkî û sîyasîyan bêboy bêro verdayene û bi polîtîkayanê tecrîd û înkarî ameyoxê ma tarî bibo. Nê demî de ke cehd est o sîyasetê demokratîkî tesfîye bikero, ma sey DEM Partî berpirsîyarîya xo ya tarîxî zanê. Na dirûşme hem nuqtaya bingeyêne ya kongreyê ma ya hem zî sozê ma yo komelî rê; eynî wext de manîfestoyêk a seba awankerdişê Prosesê Aştî û Komelo Demokratîk ke rayîro tekane yê xelasîye yê nê welatî yo.”
‘Bêrê ma pîya rayîrê aştîye akerê û komelo demokratîk awan bikerê’
Yamanî vat ke aştîya birûmete û çareserîya demokratîke esas a: “Heta ke meseleya kurdan bi hewayêko demokratîk, aştîyane û bingeyê muzakereyî ser o nêro çareserkerdene, demokrasîyêka menda û refahê komelkî mumkun nîyo. No kongre tena bedilîyayîşê îdareyî nîyo; kongreyêk o seba awankerdişê barîkatêka saxleme vera faşîzm, feqîrîye, qirkerdişê cinîyan û talankerdişê xoza. Ma heme dînamîkanê şorişgêr, demokrat, welathes û aştîhezan ê Îstanbulî û sewbîna cinî, ciwan û kedkaran dawet kenê nê rayîrşîyayîşê biheybetî. Ma do Kongreyê Îstanbulî bi o îrade bikerê ke vera tedayan sereyê xo nêçewt kena û rêça ‘Rayîrê Hîrêyinî’ ser o israr kena.”
