Hemserekê DBP’yî yê Wanî Cemal Demîrî derheqê serrgêra 16. ya dewaya KCKyî de qisey kerd û vat ke bi operasyonanê ke bi behaneyê KCKyî ameyî destpêkerdene, waşt sîyasetê demokratîkî zî tesfîye bikerê: “Seba qanûnan de bedilîyayîş çin o, fehmê ê demî hema zî nêameyo bedilnayene.”
Serranê 90an ra nat operasyonanê dewlete yê destbendkerdiş û tepîştişî vera sîyasetmedaranê kurdan bê vindertiş dewam kerd. Badê ke DTP’yî weçînayîşanê 29ê adara 2009î de serkewtişêko gird dest vist, 14ê nîsana 2009î de bi destê endamanê cemaetê Fethullah Gulenî û bi piştîdayîşê îqtîdarî operasyonê qirkerdişê sîyasî dest pêkerd. Bi nameyê “Dewaya KCK’yî” 18ê teşrîna verêne ya 2010î de roniştişê dewa dest pêkerd û zaf kesî bi cezayanê bêhuqûqan reyde rî bi rî mendî.
‘Waşt sîyasetê demokratîkî tesfîye bikerê’
Demîrî vat ke kesê ke rastê operasyonan ameyî, şaredar, endamê meclîsan, hemserekê partîyan û temsîlkarê dezgehanê demokratîkan bîy: “Kesê ke şerê çekdarî nêkerdêne û bi sîyasetê demokratîkî eleqedar bîyêne zî sey endamê rêxistine ameyêne sûcdarkerdene û tepîştene.”
‘Fehmê ê demî hema zî nêameyo bedilnayene’
Demîrî ard ziwan ke amancê nê operasyonan astengkerdişê sîyasetê demokratîkî bî û îqtîdarî na bi destê dadgehan ardêne ca: “Çunke qanûnan de bedilîyayîş çin o, fehmê ê demî hema zî nêameyo bedilnayene. Ewro zî qanûnê endamîya rêxistine (TCK 304) sey verî dewam keno, qanûnê vera terorî (TMK) hema zî eynî yo.”
‘Prosesê ewroyî de ganî dewlete fehmê xo bibedilno’
Demîrî vat ke 27ê sibate de proses dest pêkerdo zî dadgehî nê qanûnan ser o qeraranê xo danê û zaf kesî hema zî yenê tepîştene: “Eke dewlete bi rihê prosesî hereket bikero ganî nêzdîbîyayîş û fehmê xo bibedilno, qanûnan bibedilno. Ganî qanûnê taybetî yê vera sîyasetê demokratîkî binî ra bêrê bedilnayene.” Demîrî vat ke seke Rayberê Şarê Kurdan Abdullah Ocalanî vato, entegrasyonê demokratîk tena bi sîstemêkê demokratîkî mumkun o; heta ke qanûnê vera sîyasetê demokratîkî nêbedilîyê proses aver nêşono.
‘Ganî statuyê Rayberê Şarê Kurdan Abdullah Ocalanî zî bêro dîyarkerdene’
Demîrî ard vîrî ke 2013î de zî prosesêk est bî la dewlete bi rihê prosesî xo nêbedilna û qanûnî zî nêbedilnayî: “Ganî no proses nêbo amûrê menfeetanê weçînayîşî; eke îqtîdar prosesî bikero amûrê îqtîdarîye no proses tu rey serkewte nêbeno.” Demîrî peynî de vat: “Tarîxî de ame ceribnayene ke meseleya kurdan bi operasyonanê leşkerî û sîyasîyan nêyena çareserkerdene; 52 serrî vîyartî la hertim eynî çî ameyî tekrarkerdene. Rayberê Şarê Kurdan û Têgêrayîşê Azadîye zerrî ra nêzdîyê prosesî benê, ganî dewleta tirke zî wina nêzdî bibo. Ganî statuyê Rayberê Şarê Kurdan Abdullah Ocalanî zî bêro dîyarkerdene ke no proses bi weşîye ser bikewo û netîce bigîro.”
