Ankara – Parlamentera DEM Partî ya Mardînî Berîtan Guneş Altine munaqeşeyanê pêşnîyazê qanûnî yê Kizilayî de bale ante cîyakerdişê Kizilayî yê vera kurdan ser o û Kizilay ra persa: “Şima do bê cîyakerdiş vîndîyan bigêrê yan ney? Dayîkê Aştîye û Dayîkê Şemeyî serran o ke domananê xo gêrenê.”
Berîtan Guneş Altine Heyetê Pêroyî yê Meclîsî de munaqeşeyanê pêşnîyazê qanûnî yê Kizilayî de qisey kerd. Berîtan Guneş Altine dîyar kerd ke Kizilay bîyo dezgehêko ticarî û nasnameyê xo yê ardimî ra dûrî kewto.
Berîtan Guneş Altine vîr ard ke Kizilayî erdlerzê 6ê sibata 2023 de çadirî rotêne: “Mexdurê erdlerzî ke vera naye vejîyayî, rîbirîyê prosesê dadwerîye bîyî. Kizilay ardiman goreyê feydeyanê sîyasîyan şuxulneno. Şima nêwazenê feqîrîye biqedênê; wazenê feqîrîye îdare bikerê û feqîrîye ser o rantêk bigêrê. Ma zî vera feqîrîye têkoşîn kenê.”
Berîtan Guneş Altine bale ante cîyakerdişê vera kurdan ser o: “Wexto ke şer de kesî Sûrîye ra ameyêne Tirkîya, înan rê bi erebkî xizmet ameyêne dayene la penaberanê kurdan rê bi kurdkî xizmet nêameyêne dayene. Qeydeya verêne ya dezgehêko ke ardimê merdiman keno, no yo ke cîyakerdiş nêkero; coka helwesta Kizilayî problemêko gird o.”
Berîtan Guneş Altine dîyar kerd ke ganî seba kesanê ke şer de ganê xo ra bîyî, cigêrayîş bêro kerdene: “Şima do bê cîyakerdiş vîndîyan bigêrê yan ney? Dayîkê Aştîye û Dayîkê Şemeyî serran o ke domananê xo gêrenê. Ganî kesê ke Kilyos de bêkes ameyê defnkerdene, teslîmê keyeyanê înan bêrê kerdene.”
