Kongreya Neteweyî ya Kurdîstanî (KNK) Hesekê de hêrişê vera sembolanê kurdan û fotografanê şehîdan şermezar kerdî û waşt ke tavilî tehqîqatêk bêro akerdene. Goreyê KNK’yî, ganî derheqê hêrişan de eşkerayî bêro dayîş û kesê ke hêriş kerdo û peyê înan de yê, bêrê muhakemekerdene.
KNK’yî seba hedîseyanê Hesekê û hêrişê vera erj û sembolanê kurdan eşkerayîyêka nuştekî daye. Eşkerayîye de ame vatene ke KNK bi endîşe û bi tundî fotograf û vîdeoyan şermezar keno ke tede komê provokatorî wilayetê Hesekê de hêrişê vera sembolanê kurdan, beyraqe û fotografanê şehîdan kenê. Goreyê eşkerayîye, nê kerdişan de domanê qijî zî ameyê şuxulnayene.
Eşkerayîye de ame dîyarkerdene ke nê kerdişî kerdişê şexsî yê raşteameyeyî nîyê; kerdişê nijadperest û provokatorî yê sîstematîkî yê. Amancê înan xorînkerdişê fitne û nefreta neteweyî, şikitişê erjanê cuya hempare, redkerdişê prosesê entegrasyonê demokratîkî û heqaretkerdişê rûmetê şarêko. KNK’yî dîyar kerd ke nê kerdişî vera heme qanûn û normanê mîyanneteweyîyan, heqanê merdiman û heqanê domanan ê.
KNK’yî dîyar kerd ke ganî Dewleta Sûrîye berpirsîyarîya xo bi ca bîyaro; goreyê KNK’yî, ganî emnîyet, sembol û heqê hemwelatijanê kurdan bêrê pawitene. Eşkerayîye de ame vatene ke bêvengîya dewlete vera nê kerdişan manaya hemkarî û teşwîqkerdişî dana. KNK’yî dîyar kerd ke şuxulnayîşê domanan kerdişanê provokatoran de binpaykerdişêko eşkera yê Peymana Heqanê Domanan o. KNK’yî venga dezgehanê heqanê merdiman da ke nê binpaykerdişan qeyd bikerê û venga îdareyê Sûrîye zî da ke tavilî tehqîqatêk akero, provokatoran û hetanê peyê înan bigîro û ceza bikero.
Eşkerayîye de ame qetîkerdene ke kurdê Rojava û Sûrîye parçeyêko bingeyên yê Sûrîye yê û heqê înan yê neteweyî û sîyasî meşru yê. Goreyê KNK’yî, nê kerdişê erzanî nêşenê kurdan bişiknê; israrê înan yê yewîya kurdan û pawitişê destkewteyan do zêde bikerê. KNK’yî venga heme hêzanê neteweyî û demokratîkan yê Sûrîye û ereban da ke nê kerdişan şermezar bikerê: “Ameyoxê Sûrîye bi provokasyonan awan nêbeno; tena bi naskerdişê yewbînan û rêzegirewtişî awan beno. Biciwîyo wayûbirayîya şaran.”
