Wan – Cinîyê ke her serre verê zimistanî seba hedrekerdişê werd û şimitişî kewtêne hereket, emser semedê krîzê ekonomîkî û giranîye nêamê têhet. Cinîyan dîyar kerd ke semedê giranîye nêeşkayê hedrekarîyê zimistanî goreyê zerrîya xo bikerê.
Serranê verênan de Wan de verê zimistanî hewş û kuçeyan de boya adirî, konserve, turşî, salça û firingîyanê huşkkerdeyan ameyêne. La emser krîzê ekonomîkî yo xorîn û berzbîyayîşê fîyatê werdan no adet kerd xemgînî. Enflasyonê serreyî se ra 29,73 – 30,89 ra ame war zî, zamê fîyatanê werdan hêzê herînayîşê hemwelatijan zaf kêmî kerdo. Cinîyanê Wanî ajansê ma rê qisey kerd.
Behîce Abî dîyar kerd ke emser seba zimistanî tu çî hedre nêkerdo: “Serranê verênan ma turşî viraştêne, sebzeyî huşk kerdêne. La emser fîyatê firîngan û îsotan zaf berz bî. Nika kîloya penêrî bîya 700 lîreyî, kîloya goştî resaya hezar lîreyan. Keyeyî est ê ke 10-12 kesî tede ciwîyenê; keyeyêko winasî nêeşkeno seba zimistanî di kîloyî penêr biherîno. No zam û krîz bi xo şerêk o vera şarî.”
Behîce Abî bale ante muhîmîya xebata cinîyan ser o: “Ma cinî xebatkar nîyê; seba ma tu atolye yan kurs nêameyo akerdene. Eke cinî aşme de tayê pere qezenc bikerê, mesrefê keyeyî do kêmî bibo. Ma wazenê ke verê her çî azadî û aştî bêro ca. Eke aştî bêro, no krîzê ekonomîkî zî do meydan ra wedarîyo. Erdê Kurdîstanî dewlemend o la reyna zî ma seba her çî bac danê.”
Zeynep Oklû dîyar kerd ke keyeyê înan hewt kesan ra ameyo meydan û tena mêrdeyê aye ke înşaat de xebitîyeno, kar keno: “Serranê verênan ma her serre 50 kîloyî turşî viraştêne la emser tena 10 kîloyî viraştî. Nê şaristanî de firsendê ke cinî bi xo bixebitîyê û debara xo bikerê zaf kêm ê.”
Saîme Oklû zî zehmetîya keyeyê xo ard ziwan: “Ciwanê nê wextî kar nêvînenê. Verê cû eke keyeyêk de yew kes bixebitîyêne, merdim eşkayêne debara xo bikero. La nika zaf kesî bixebitîyê zî zor o. Ma bi firsendanê xo yê kêman seba zimistanî penêr û turşî viraştî, mişmişî û şeftalîyî huşk kerdî.”
